Qaladan aýylǵa: BQO-da jas dárigerlerge jańa baspana berildi
ORAL. KAZINFORM — Kaztalov aýdanynyń Jalpaqtal aýylynda «Qaladan — aýylǵa» baǵdarlamasy aıasynda qaladan kóship kelgen medıtsına salasy mamandaryna turǵyn úı kiltteri tabys etildi.
s-sharaǵa qatysqan Batys Qazaqstan oblysy ákiminiń orynbasary Tilepbergen Kaıýpovtyń atap ótkenindeı, Memleket basshysynyń aýyldardy damytý jónindegi tapsyrmalaryn júzege asyrý barysynda óńirde jumystar atqarylyp jatyr.
— Ótken jyly oblys ákimi Narıman Tóreǵalıulynyń bastamasymen «Qaladan — aýylǵa» jobasy iske qosylǵan bolatyn. Baǵdarlamanyń negizgi maqsaty — qalada turatyn aýyl azamattaryn qaıta oraltý arqyly aýyldyq eldi mekenderdiń áleýmettik-ekonomıkalyq áleýetin arttyrý, kadr tapshylyǵy máselesin sheshý. Atalǵan joba aıasynda ótken jyly oblys boıynsha 42 turǵyn úı berilse, bıylǵy jyldyń basynan beri 16 baspana satyp alyndy. Bul — aýyldaǵy ınfraqurylymdy damytý men sapaly adam resýrstaryn tartýdaǵy júıeli qadamdardyń naqty nátıjesi. Aldaǵy ýaqytta bul baǵyttaǵy jumystar jalǵasyn tabatyn bolady, — dedi T.Kaıýpov.
Jalpaqtalda baspanaly bolǵandar arasynda Aqtóbe qalasyndaǵy M.Ospanov atyndaǵy medıtsına ýnıversıtetin támamdaǵan osy aýyldyń týmasy, jalpy tájirıbeli dáriger Asylzada Qumar, Qyzylorda oblysy, Baıqońyr qalasynan kelgen reanımatolog-anestezıolog Asylhan Shakızadaev bar. Sondaı-aq tarazdyq akýsher-gınekolog Móldir Ibragımova, Qostanaı oblysy, Denısov aýdanynan kelgen jalpy tájirıbeli dáriger Erbolat Bosynbekovke jańa turǵyn úı berildi.
Jalpy, ótken jyly Kaztalov aýdanyna atalǵan baǵdarlama aıasynda 19 otbasy, ıaǵnı 106 adam kóship kelgen.
Eske sala keteıik, budan buryn BQO-da «Qaladan aýylǵa» pılottyq jobasy júzege asyrylatynyn jazǵan bolatynbyz.