Qaladaǵy quqyqtyq tártipti qamtamasyz etýge Astananyń kúzet mekemeleri de tartylady
ASTANA. 5 aqpan. QazAqparat - Astana qalasynyń Іshki ister departamentinde kúzet fırmalarynyń ókilderi men polıtsııa qyzmetkerleriniń kezdesýi ótti.
Onda kóterilgen negizgi taqyryp turǵyn úı qaýipsizdigi máseleleri jóninde turǵyndar arasynda júrgiziletin túsindirý jumystaryn jandandyrý. Bul týraly departamenttiń baspasóz qyzmetinen habarlady.
Elordanyń resmı saıtynyń jazýynsha, búgingi tańda Astanada pýlttik kúzet qyzmetin kórsetetin 18 uıym jumys isteıdi. Olardyń qyzmetterin páterler men jeke úılerdiń turǵyndary paıdalanady.
Osy kúzet uıymdarynyń baqylaýyndaǵy páterler men úılerge urlyqqa túsý óte qıyn. Tipti, urlyq jasaýǵa talpynǵandardy kúzet fırmalary men polıtsııa ókilderi der kezinde ustaıdy, deıdi uıym basshylary.
Astana qalasy ІІD bastyǵynyń orynbasary Batyrlan Esenbaıdyń aıtýynsha, qala aýmaǵynda kún saıyn kúzet fırmalarynyń 50 avtopatrýli qyzmet etedi, olar páterlerge túsken urylar men basqa da qylmyskerlerdi tutqyndaýǵa aıtarlyqtaı úles qosyp keledi.
Departamenttiń baspasóz qyzmetiniń aqparatyna sáıkes, astanalyq ishki ister departamentinde 2012 jylda atqarylǵan jumystardy qorytyndylaý jóninde keńes ótti. Jıynǵa tóraǵalyq etken ІІM mınıstri Qalmuhambet Qasymov zamanaýı talapqa saı zııatkerlik qaýipsizdik júıesin engizý jónindegi Prezıdenttiń tapsyrmasyn iske asyrý boıynsha tájirıbelik-uıymdastyrý sharalar keshenin qabyldaý qajet ekendigin atap ótti.
Sonymen qatar, Qalmuhambet Qasymov quqyqtyq tártipti ornatýda kúzet uıymdarymen birlesip jumys isteýdiń jańa úlgilerin qaraýdy tapsyrdy.
Osy tapsyrmalarǵa baılanysty Astana qalasynyń ishki ister departamenti turǵyndarǵa turǵyn úı qaýipsizdigi máseleleri, urlyqty azaıtý jóninde túsindirý jumystaryn jandandyrady.
Óz kezeginde, kúzet fırmalarynyń basshylary urlyqtyń aldyn alý máselesi boıynsha polıtsııamen tyǵyz baılanysta jumys isteýge daıyn ekendikterin bildirdi. Sonymen birge, páterler men kottedjderge kúzet qondyrǵylaryn ornatý baǵasyn arzandatý máselesin qaraıtyndyqtaryn da aıtty.
Buǵan qosa, bas qosýda baǵa saıasaty, atap aıtqanda, kúzet sıgnal berý júıesin montajdaý men abonenttik tólem quny tóńireginde áńgime órbidi. Qazirgi ýaqytta abonenttik tólemniń quny aıyna 5 myńnan bastap 10 myńǵa deıin jetedi. Júıeli suhbat barysynda, abonenttik tólemniń qunyn 15-ten 30%-ǵa deıin arzandatý týraly kelisim jasaldy.
Keńeste sóz alǵan «Sıgnal» KF» basshysy: «Tutas podezd nemese úı qyzmetimizge qosylsa turǵyndarǵa tıimdi bolar edi. Mundaı jaǵdaıda montaj ben abonenttik tólem quny da aıtarlyqtaı arzandaıdy», - dedi.
Turǵyndar úılerine kúzet qondyrǵylaryn ornatsa, qylmyskerlerdiń páterlerge urlyqqa túsý múmkindikteri azaıar edi, deıdi kúzet fırmalarynyń ókilderi.
Sonymen qatar, keńeste qylmystardy azaıtý maqsatynda jeke kúzet fırmalary men polıtsııa qyzmetkerleriniń birlesip kúzetý máseleleri de talqylandy. Buǵan qosa, fırma ókilderi qoldanystaǵy jabdyqtar jaıly sóz etti (atap aıtqanda kúzet fırmalarynyń biri Izraılde shyǵarylǵan jabdyq týraly aqparat berdi).
ІІD bastyǵynyń orynbasary Batyrlan Esenbaı kezdesýdi qorytyndylaı kele, qylmystardy joıýda kúzet fırmalary men polıtsııa qyzmetkerleriniń birlesip jumys isteıtindikterine senim bildirdi.
