Qalada bilim alǵan aýyl jastarynyń 40 paıyzy ǵana aýylyna oralady
ASTANA. QazAqparat - Qazirgi kúni aýyl jastarynyń nebary 40 paıyzy óz aýylyna oralyp, qyzmetke ornalasady. Al qalǵan 60 paıyzy qalalarda qalyp qoıady. Bul týraly búgin S.Seıfýllın atyndaǵy Qazaq agrotehnıkalyq ýnıversıtetinde ótken «Ekonomıkanyń naqty sektory úshin mamandar daıyndaýdaǵy ýnıversıtet pen jumys berýshilerdiń seriktestigi» taqyrybyndaǵy respýblıkalyq forýmda aıtyldy.
Sharaǵa Májilis tóraǵasynyń orynbasary Vladımır Bojko, Senat depýtaty Rashıt Akımov, S.Seıfýllın atyndaǵy QazATÝ AQ Basqarma tóraǵasy Aqylbek Kúrishbaev jáne depýtattar men ózge de otandyq, sheteldik agrobıznes ókilderi, qaýymdastyqtar, sondaı-aq qoǵamdyq uıym men saıası partııa ókilderi qatysty.
Forým barysynda sóz alǵan Májilis tóraǵasynyń orynbasary Vladımır Bojko QazATÝ bazasynda aýyl sharýashylyǵy mamandaryn qaıta daıarlaýǵa baılanysty arnaıy kýrstar ashý kerektigin alǵa tartty. Sebebi búgingi tańda eldi mekenderde mamandar jetkiliksiz. Bolǵan kúnniń ózinde zamanaýı tehnologııa negizinde jumys jasaýǵa qabiletsiz. Ol aýyldyq kvota arqyly kelip, bilim alyp jatqan jáne bitirip ketken mamandardy aýylǵa qaıtarý kerektigin basa aıtty. Óıtkeni aýyldyq jeńildik arqyly bilim alǵan jas maman óz aýylyna barsa, aýyl sharýashylyǵy salasyndaǵy kadr tapshylyǵyn azaıtýǵa septigin tıgizeri sózsiz.
«Qazirgi kúni aýyl jastarynyń nebary 40 paıyzy óz aýyldaryna oralyp, qyzmetke ornalasady. Al qalǵan 60 paıyzy qalalarda qalyp qoıady. Bul - alańdatarlyq másele», - dedi Vladımır Bojko.
