Qalada aqyly avtoturaqtar bolýy kerek – Jeńis Qasymbek
Astana qalasynyń ákimi Jeńis Qasymbek aqyly avtoturaqtar máselesin sheshýge qatysty atqarylyp jatqan jumystar jaıly aıtyp berdi, dep habarlaıdy Kazinform.
«Qalada aqyly avtoturaqtar bolýy kerek. Mundaı sheshim álem elderinde de iske asyrylyp jatyr. Onsyz eshbir álem astanalarynda kólik keptelisi máselesi sheshilmeıdi», – dedi J. Qasymbek elorda kásipkerlerimen kezdesýden keıin tilshiler suraǵyna jaýap bere otyryp.
Aıtýynsha, qazir aqyly avtoturaq jumysyna jaýapty kompanııamen seriktestik qatynastary qaıta qaralyp jatyr. Eger ákimdik usynǵan talaptarmen kelispese, onda bul kompanııamen aradaǵy shart toqtatylady.
Jaqynda ákimdik avtoturaq oryndaryna qatysty ózgeris engizbek. Bul rette, áleýmettik nysandardyń mańynda, ıaǵnı aýrýhanalar, mektepter aımaǵyndaǵy oryndarda turaqtar tegin bolady.
Sonymen qatar ákim elordanyń sol jáne oń jaǵalaýyndaǵy birqatar kóshede birjaqty kólik qozǵalysy bolatynyn aıtty.
«Qazir Abaı jáne Kenesary dańǵyldarynda birjaqty qozǵalys bar. Jalpy, elordanyń sol jáne oń jaǵalaýyndaǵy kóshelerde birjaqty kólik qozǵalysy bolady. Degenmen dál qazir qaı kóshelerge osy jańa tártip engiziletinin aıta almaımyn. Bul máseleni qala turǵyndarymen aqyldasyp baryp bir sheshimge kelemiz», – dedi Jeńis Qasymbek.
