Qalaaralyq qatynastarda jolaýshylardy avtobýstarmen tasymaldaý lıtsenzııalanatyn bolady- zań jobasy
ASTANA. Sáýirdiń 14-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy,
dep habarlaıdy QazAqparat.
Atalǵan zań jobasynyń negizgi maqsaty Memleket basshysynyń Jarlyǵymen bekitilgen 2015 jylǵa deıingi Kólik strategııasynyń erejelerin iske asyrý jáne osy saladaǵy quqyqtyq olqylyqtardy joıý bolyp tabylady. Sonymen birge, qujat boıynsha tasymaldaý úderisin jáne kólik qyzmetin memlekettik retteý júıesin jaqsartý, kólik zańnamasyn halyqaralyq quqyqqa sáıkes keltirý jolymen temir jol, avtokólik joldary jáne basqa da salalardaǵy zańnamalyq bazany odan ári jetildirý kózdeledi.
Zań jobasymen Jer jáne Sý kodeksterine, sondaı-aq 8 zańǵa ózgerister engizý qamtylyp otyr. Sonymen qatar, qujat arqyly avtomobıl kóligi salasynda azamattardyń ómiri men densaýlyǵynyń qaýipsizdigin, qyzmet tutynýshylardyń múddelerin qorǵaýdy qamtamasyz etý maqsatynda birqatar normalar engizilgen. Atap aıtqanda, halyqaralyq jáne qalaaralyq qatynastarda jolaýshylardyń avtobýstarmen, shaǵyn avtobýstarmen tasymaldanýyn lıtsenzııalaý engiziledi. Al temirjol kóligi salasynda vokzaldardaǵy medıtsınalyq pýnktter men qoǵamdyq tártipti saqtaý beketteriniń bolýyn kózdeıtin normalar qamtylǵan. Sý kóligi salasynda Soltústik Kaspıı boıynsha Ónimdi bólý jónindegi kelisimdi iske asyrý maqsatynda kemeniń ulttyq tıesiligi, Qazaqstan Respýblıkasynyń Memlekettik týyn kóterip júzý quqyǵy jónindegi baptardyń redaktsııalary naqtylanady.
Zań jobasymen jumys barysynda depýtattar tarapynan 730-dan astam usynys kelip túsken. Zań jobasy ekinshi oqylymǵa ázirleý úshin komıtetke tapsyrylady.
