Qalaaralyq avtobýstar 5 maýsymnan bastap qatynaıdy – IIDM
NUR-SULTAN. QazAqparat - Qalaaralyq avtobýstar 5 maýsymnan bastap qatynaıdy, dep habarlaıdy QazAqparat QR IIDM baspasóz qyzmetine silteme jasap.
2020 jyly 13 mamyrda Qazaqstan Respýblıkasy aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń sheshimine sáıkes, 5 maýsymynan bastap avtomobıl kóligimen jolaýshylar tasymaly qalpyna keltiriledi.
Jolaýshylardy avtobýstarmen tasymaldaý kezinde tasymaldaýshylardyń tıisti jumys algorıtmi Bas sanıtarlyq dárigerdiń qaýlysynyń talaptaryn eskere otyryp ázirlendi.
Atap aıtqanda, baǵdardyń sońǵy pýnktinde avtobýsqa dezınfektsııa júrgizý; jolaýshylardy salonǵa maskamen ǵana kirgizý; jolaýshylardyń 1 metr qashyqtyqty ustanýy; júrgizýshini qolǵap, maskamen qamtamasyz etý, ony árbir 2 saǵat saıyn aýystyrý; avtopark qyzmetkerin eki aptada 1 ret SOVID-19-ǵa teris nátıje týraly anyqtama bolǵan kezde ǵana jumysqa shyǵarý sııaqty talaptar qoıylady.
Ákimdikter jolaýshy tasymaly kezinde koronavırýs ınfektsııanyń taralýynyń aldyn alýda tıimdi bolý úshin tasymaldaý protsesine qatysýshylardyń osy algorıtmge sáıkestigin qamtamasyz etýge qajetti sharalardy qabyldaýy tıis.
Qazirgi ýaqytta respýblıkada 313 qalaaralyq baǵyt bar. Olardy 610 avtobýspen (syıymdylyǵy 45-55 oryndyq III sanattaǵy avtobýstar) 88 tasymaldaýshy kásiporyn atqarady.
Eske sala ketsek, 1 maýsymnan qalalar arasynda blokpostar alyp tastalady. Jeke avtokólikpen qalalar arasynda saparlaýǵa ruqsat etiledi.
Aıta keteıik, 19 naýryzdan bastap Nur-Sultan men Almaty qalalarynda karantın jarııalandy. Sol kezden bastap elordadan shyǵatyn qalaaralyq avtobýstardyń qozǵalysyna tyıym salyndy. Al, Shymkentten elorda men Almatyǵa qatynaıtyn avtobýstar 18 naýryzda toqtatyldy.
