Qala jastaryn «asfalt qazaǵy» dep bólýge bolmaıdy — Prezıdent
ASTANA. KAZINFORM — Prezıdent Qazaqstan Halyq Keńesiniń birinshi sessııasynda sóılegen sózinde jazýshylardy qala taqyrybyna arnalǵan shyǵarmalardy kóbirek jazýǵa shaqyrdy.
— Biz aýyl týraly kóp aıtamyz. «Aýyl — halqymyzdyń altyn besigi» dep árbir jıynda aıtyp júremiz. Rasynda, bul — durys. Biraq qazirgi zamanda bul sózdi qaıta-qaıta aıta berýdiń qajeti bar ma? , — dep atap ótti Prezıdent.
Memleket basshysy dúnıe júzinde «ýrbanızatsııa» atty jahandyq úrdis bolyp jatqanyn eske saldy.
— Búginde ómirdiń qyzyǵy — qalada. Bul da — shyndyq. Qazirdiń ózinde biz qalada jınalyp otyrmyz. Sondyqtan aldymyzda turǵan mańyzdy ári ózekti mindet: qala órkenıetin dáripteýimiz kerek. Bul iste órkenıettiń ozyq talaptaryna saı bolýymyz qajet, — dedi ol.
Prezıdenttiń aıtýynsha, qalada turatyn jastardy «asfalt qazaǵy» nemese «shala qazaq» dep ataý durys emes.
— Keıbir jazýshylar qalada turyp jatqan jastardy ekige bóletin boldy: birinshisi — qalalarda turyp jatqan «asfalt qazaǵy» nemese «shala qazaq», ekinshisi — naǵyz aýyl qazaqtary. Bul — durys emes. Qazirgi tańda qalalarda ómir súrip jatqan jastarymyz qazaq mektepterinde qazaq tilinde sapaly bilim alýda. Sondyqtan birtutas halqymyzdy ekige bólýdi doǵarýymyz kerek. Mundaı áreketti jasaýdyń eshqandaı qajeti de, oǵan eshkimniń haqy da joq. Osyǵan baılanysty taıaýda Mádenıet jáne aqparat mınıstrligine tapsyrma berdim. Jazýshylar arasynda qala taqyrybyna arnalǵan ádebı saıystar ótkizýimiz kerek. Bul halqymyzǵa, ásirese, jastarymyzǵa kerek dúnıe bolmaq, — dedi Qasym-Jomart Toqaev.
