Qala tolǵan qoqys pen balshyq - Baqyt Sultanov

NUR-SULTAN. QazAqparat - Elorda ákimi Baqyt Sultanovtyń tóraǵalyǵymen ótken apparat otyrysynda turǵyn úı-kommýnaldyq sharýashylyǵynyń qazirgi jaǵdaıy, tazalyq máselesi kóterildi, dep habarlaıdy QazAqparat Elorda Info saıtyna silteme jasap.

«Búgingi kúni qalanyń barlyq tirshilikti qamtamasyz etý nysandary shtattyq rejimde jumys isteýde. Tótenshe jaǵdaı tirkelgen joq. 26 naýryzdan bastap qala boıynsha ekologııalyq aılyq bastaldy. Ótken demalysta bolǵan alǵashqy senbilikte elordada 900 aýla tazartyldy», - dedi qala ákiminiń orynbasary Arman Turlybek.

Onyń deregine súıensek, senbilikke Almaty aýdanynan - 3500, Baıqońyr aýdanynan - 3700, Esil aýdanynan - 3465 jáne Saryarqa aýdanynan 900 adam qatysty.

«Jerasty sý deńgeıiniń kóterilýine, jaýyn-shashynnyń kóbeıýine baılanysty turǵyndardyń kommýnaldyq qyzmetterde túsken shaǵymdary kóbeıdi. Atap aıtqanda, tek 31 naýryz kúni turǵyndardan 909 shaǵym kelip tústi. Ótken aptanyń ishinde aýdan ákimderi 750 ótinish-shaǵym boıynsha jumys istedi», - dedi ol.

Sonymen qatar A.Turlybek áleýmettik jelilerde qala boıynsha sanıtarlyq tazalyqtyń joqtyǵyna qatysty aryz-shaǵymdardyń da kóbeıip otyrǵanyn tilge tıek etti.

«Sondyqtan, Baqyt Turlyhanuly, atalǵan kemshilikterdi joıý maqsatynda aýdan ákimderine tıisti tapsyrmalardy berýińizdi suraımyn. Búgingi kúni qala boıynsha 1842 aýla alańynda 10477 qoqys konteıneri ornatylǵan. Qazirgi ýaqytta qoqys shyǵarýǵa qatysty turǵyndardyń shaǵymy kóbeıip ketti. Buǵan qatysty áleýmettik jelilerde jazbalar men fotosýretter dáleli az emes. Munyń sebebi - qoqystyń ýaqytynda tazalanbaýy. Sondaı-aq konteınerdiń ózi bos, biraq onyń jan-jaǵy qoqysqa tolyp jatady. Osyndaı jaǵdaıdyń oryn alýyna tazalyqqa jaýapty merdiger kompanııalardyń tolyq anyqtalmaýy da áserin tıgizýde. Osyǵan oraı, aýdan ákimderine atalǵan máseleni tezirek sheshý jáne qoqys alańdarynyń tazalyǵyn qadaǵalaý tapsyrmalaryn berýińizdi suraımyn», - dedi Arman Turlybek qala ákimi Baqyt Sutanovqa qarata.

Odan bólek, ákim orynbasary qala jáne qala mańyndaǵy sý tasqynyna qatysty jaǵdaıǵa toqtaldy. Onyń sózine sensek, elordany sý basý qaýpi joq.

Óz kezeginde shahar basshysy Baqyt Sultanov qystan keıin qala qoqysqa tolyp ketkenin atap ótti.

«Kóktem kelip qar erýde. Biraq artynan bar bylyqtary shyǵyp jatyr. Qazir qala tolǵan qoqys pen balshyq, saz. Men osy turǵyda arnaıy mobıldi top quryp, tekserýdi tapsyrdym. Sýretten qarańyzdarshy ne bolyp jatqanyn. Osynyń bári jumystyń ýaqytyly atqarylmaýynan. Áıtpese, qarajat bar, resýrs bar, qajetti mamandar bar. Aýdan ákimderi qaıda qarap otyrsyzdar?»,- dedi ákim.