Qala syrtyndaǵy joldarda apat sany azaıdy

ASTANA. KAZINFORM -  Qazaqstannyń qala syrtyndaǵy trassalarynda apattylyqtyń tómendeýi baıqalady. 2025 jyldyń basynan beri bul joldarda jol-kólik oqıǵalarynyń sany 8% azaıdy. Sonymen birge jol apattarynda zardap shekkenderdiń de sany tómendedi, - dep jazdy Polisia.kz.

Buǵan Іshki ister mınıstrliginiń jol qozǵalysy qaýipsizdigin qamtamasyz etý boıynsha qabyldaǵan sharalary yqpal etti. Negizgi sharalardyń biri joldardyń qaýipti ýchaskelerinde júris bóligin ýaqytsha taryltý tásili boldy.

Joldyń mundaı bólikterinde avtokólik júrgizýshileri ınstınktıvti túrde jyldamdyqty azaıtady. Atalǵan ádis birqatar shet elde óziniń tıimdiligin kórsetip, búginde Qazaqstanda sátti qoldanylyp jatyr.

Joldy taryltý tásili Astana – Qaraǵandy, Astana – Pavlodar, Almaty – Bishkek, Samara – Shymkent, Aqtóbe – Astrahan sııaqty jáne basqa baǵyttardy qosa alǵanda respýblıkalyq trassalardyń 26 ýchaskesinde júzege asyrylyp keledi. Onda patrýldik ekıpajdar jumys isteıdi. Polıtseıler júrgizýshilerdi jyldamdyq rejımin saqtaýǵa, jolda muqııat bolýǵa shaqyrady. Maqsat – jazalaý emes, jol apattarynyń aldyn alý.

Elimizdiń jeti óńirinde ushý qurylǵylarynyń kómegimen áýeden patrýldeý júrgiziledi. Sonyń nátıjesinde úsh myńnan astam quqyqbuzýshylyqtyń joly kesildi. Avtojoldarda buzýshylyqtardy tirkeýdiń 500-ge jýyq kesheni jumys isteıdi, onyń ishinde 100-i jasyryn rejımde.

Qozǵalys qarqyndy ýchaskelerde ortasha jyldamdyqty baqylaý engizildi. Qazir 1900 shaqyrym qamtylsa, jaqyn arada taǵy myń shaqyrym qosylady.

Jol júrisi qaǵıdalaryn qasaqana buzýshylarmen belsendi kúres júrgizilip jatyr. Ol úshin «Qorǵaý» arnaıy aqparattyq júıesi qoldanylady. Sonymen qatar qala ishinde jáne trassalarda táýlik boıy jol qozǵalysy erejelerin buzýdy tirkeıtin avtomatty kameralar jelisi belsendi damyp keledi.

Buǵan deıin jol apatyna kináli adam oqıǵa ornynan qashyp ketse ne isteý kerek ekenin jazǵan bolatynbyz.