Qala men aýyl turǵyndarynyń qansha paıyzy taza aýyz sýmen qamtylǵan

ASTANA. KAZINFORM — Elimizde qala turǵyndarynyń — 99,4, al aýyl halqynyń 97,8 paıyzy sýmen jabdyqtaý qyzmetimen qamtamasyz etilgen.

Bul týraly Ónerkásip jáne qurylys Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov aıtty.

— Memleket basshysy 2021 jyldyń 1 qyrkúıegindegi Qazaqstan halqyna Joldaýynda 2025 jyldyń sońyna deıin barlyq qala men aýyldy sapaly aýyz sýmen 100 paıyz qamtamasyz etý tapsyrmasyn bergen bolatyn. Atalǵan tapsyrmany oryndaý aıasynda bıýdjetten 1 trln teńgeden astam qarajat bólindi, — dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, qarajat eń birinshi turǵyn sany eń kóp eldi mekenderge bólinedi. 

— Aýyz sýmen eń tómen qamtylý deńgeıi Abaı oblysy men Qostanaı oblysy aýyldarynda baıqalady. Bıyl bul jumysty jalǵastyrýǵa bıýdjetten 410 jobaǵa 176 mlrd teńge qarastyrylǵan, — dedi Baqytjan Júnisbekov.

Komıtet basshysynyń sózine qaraǵanda, turǵyndar sany az eldi mekenderde bıýdjet qarjysyn tıimdi paıdalaný úshin sý tazalaıtyn keshendi blok-modýlder ornatý kózdelgen. Degenmen, 199 aýyldyń turǵyndary uńǵymalary men qudyqtary bolǵandyqtan, mundaı qondyrǵy ornatqyzýdan bas tartyp otyr. Sondyqtan da atalǵan eldi mekenderde ákimdikter sanıtarlyq-epıdemıologııalyq baqylaý organdarymen birlesip, zerthanalyq zertteýler júrgizý úshin sýdan synama alyp otyrady.

Buǵan deıin Qyzylorda oblysynda 23 aýylda ortalyqtandyrylǵan aýyz sý joq bolsa, Soltústik Qazaqstan oblysynda 7,4 myń turǵyny bar 88 aýyldyq eldi meken taza aýyz sýmen qamtamasyz etilmegenin jazǵan edik.