Qala men aýdandardyń barlyǵy birdeı el damýyna atsalysyp jatqan joq - Qostanaı oblysynyń ákimi
ASTANA. 19 jeltoqsan. QazAqparat - Búginde biz árbir qala men aýdannyń múmkindikterin baǵamdap, oblysty damytýdyń uzaqmerzimdi strategııasyn daıarlap jatyrmyz. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Qostanaı oblysynyń ákimi Nuraly Sádýaqasov málim etti.
Ákimniń aıtýynsha, oblystaǵy qala men aýdandardyń barlyǵy birdeı ındýstrıaldy-ınnovatsııalyq damý baǵdarlamasyna atsalysyp jatqan joq. Ony eki jyl boıy júrgizilgen arnaıy zertteý jumystary kórsetti. Sonyń saldarynan aımaqtyń damýynda ekonomıkalyq tepe-teńsizdik baıqalady. Onyń basty sebebi - durys josparlaýdyń bolmaýy jáne qolda bar resýrstardy tıimdi paıdalana almaýy. «Osyǵan baılanysty aımaqtyń árbir salasyn jandandyrý maqsatynda Qostanaı oblysynyń 2025 jylǵa deıingi damý strategııasy daıarlanyp jatyr. Bul jumysqa reseılik sarapshylar tartylyp otyr. Biz árbir qala men aýdannyń jeke úlesin baǵamdap shyqtyq. Bolashaqta sol strategııa boıynsha jumys isteıtin bolamyz», - dep atap kórsetti N.Sádýaqasov.
