Qala men aýdan ákimderiniń jumysy KPI kórsetkishteri boıynsha baǵalanady – ShQO ákimi
ÓSKEMEN. KAZINFORM – Shyǵys Qazaqstan oblysy ákimdiginde qala men aýdan ákimderiniń qyzmetin baǵalaý reıtıngi nátıjeleri boıynsha memorandýmǵa qol qoıý rásimi ótti. Bul baǵalaýda KPI kórsetkishteriniń oryndalýyna basty nazar aýdarylady.
ShQO ákimi Nurymbet Saqtaǵanovtyń tapsyrmasy boıynsha is-sharalardy sapaly júzege asyrý jáne árbir ákim úshin sandyq nemese paıyzdyq mándegi negizgi tıimdilik kórsetkishterin (KPI, Key Performance Indicators) anyqtaý maqsatynda oblystyq jumys toby qala men aýdandardy aralady.
KPI quramyna 2025 jylǵa arnalǵan qalalar men aýdandardyń iri ári mańyzdy jobalary engizildi. Bul jobalar ekonomıkanyń ósýine, jumys oryndarynyń qurylýyna jáne salyq túsimderiniń artýyna eleýli úles qosady.
– Ekonomıka jáne bıýdjettik josparlaý basqarmasyna qalalar men aýdandar ákimderiniń qyzmetin baǵalaý reıtınginiń qorytyndysyn shyǵarý mehanızmin ózgertý boıynsha usynys engizý qajet. Bul reıtıngte KPI kórsetkishteriniń oryndalýyna basymdyq berilýi tıis. Ár ákimge 2025 jylǵa arnalǵan salyq túsimderiniń ósýin qamtamasyz etý jáne tórt naqty jobany júzege asyrý boıynsha kórsetkishter belgilengen, - dedi oblys ákimi Nurymbet Saqtaǵanov.
Memorandýmǵa oblys ákimimen qatar Óskemen, Rıdder, Altaı qalalarynyń, sondaı-aq Altaı, Samar, Úlken Naryn, Marqakól, Glýbokoe, Zaısan, Katonqaraǵaı, Kúrshim, Tarbaǵataı, Ulan, Shemonaıha aýdandarynyń ákimderi qol qoıdy.