Qala magıstraldary Úlken Almaty aınalma jolyna deıin uzartylyp jatyr
ALMATY. KAZINFORM — Almaty ákimi Darhan Satybaldy radıaldy kóshelerdi Úlken Almaty aınalma avtomobıl jolyna deıin uzartý jobalarynyń júzege asý barysyn tekserdi.
Qala ákimdiginiń málimetinshe, jumys sapary barysynda jol ınfraqurylymyn damytý, sonyń ishinde qalany aglomeratsııamen baılanystyratyn negizgi kóshelerdi uzartý qarqyny qaralǵan. Almaty oblysy ákimdiginiń basqarma basshylarymen birge jer telimderin satyp alý, jobalyq-smetalyq qujattamany jańartý jáne nysandardy keıin qala balansyna berý máseleleri talqylanǵan.
Ákimniń aıtýynsha, qala men oblys ákimdikteriniń úılesimdi is-qımyly jobalardy belgilengen merzimde aıaqtaýǵa jáne aglomeratsııa úshin birtutas kólik júıesin qalyptastyrýǵa múmkindik beredi. Merdiger uıymdarǵa jumysty sapaly ári ýaqytynda oryndaý, sondaı-aq ár kezeń boıynsha jeke jaýapkershilikti saqtaý tapsyrylǵan.
Qazir Abaı jáne Rysqulov dańǵyldaryn, Saıyn, Soltústik aınalma jáne Tilendıev kóshelerin qala shekarasyna deıin uzartý jumystary júrip jatyr. Al Aqyn Sara kóshesin uzartý tolyq aıaqtalǵan.
— Almaty qalasy men aglomeratsııa arasyndaǵy úzdiksiz kólik baılanysyn qamtamasyz etý maqsatynda atalǵan magıstraldar Úlken Almaty aınalma avtomobıl jolyna deıin uzartylýy kerek, — dep jazdy qala ákimi.
Eske salaıyq, buǵan deıin Almatyda Raıymbek dańǵylyn Shyǵys aınalma jolyna deıin uzartý úshin 54 ýchaske alynatynyn habarlaǵanbyz.