Qala qurylysy kodeksiniń jobasyn ázirleıtin jumys toby qurylady

NUR-SULTAN. QazAqparat – Megapolısterde qurylystardyń tyǵyz salynýy jurtshylyqtyń oryndy narazylyǵyn týdyryp otyr. Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Otandyq ekonomıkanyń damýyna qurylys salasynyń yqpaly zor. Turǵyn úımen qamtamasyz etý – halyq úshin eń ózekti máseleniń biri. Degenmen, sapasyz qurylys faktileri, qurylys salýshylardy tańdaý rásimderiniń ashyq bolmaýy, megapolısterde qurylystardyń tyǵyz salynýy jurtshylyqtyń oryndy narazylyǵyn týdyrýda», - dedi Álıhan Smaıylov búgin Úkimet otyrysynda.

Osyǵan baılanysty Premer-Mınıstr Indýstrııa mınıstrligine múddeli memlekettik organdarmen birlesip, sala mamandaryn, sáýletshilerdi, ǵylymı qaýymdastyqty tarta otyryp, Qala qurylysy kodeksiniń jobasyn ázirleý úshin Jumys tobyn qurýdy jáne bastamalardy keńinen talqylaýdy tapsyrdy.