Qala qurylysy kodeksin ázirleý kerek - Tasmaǵanbetov
ASTANA. QazAqparat -Astana qalalyq kásipkerler palatasynyń basshysy Ǵanı Tasmaǵanbetovtyń aıtýynsha, qazirgi zańnamany túzetpeıinshe sáýlet jáne qala qurylysy salasyndaǵy jemqorlyq áreketteri azaımaıdy, dep habardaıdy QazAqparat tilshisi.
«Bizdiń taldaýymyzǵa sáıkes, sáýlet jáne qala qurylysy salasyndaǵy jemqorlyqtyń basty sebebi - qazirgi zańnamanyń solqyldaqtyǵy. Qoldanystaǵy «Sáýlet jáne qala qurylysy týraly» zańnyń tikeleı kúshi bar dep aıtýǵa bolmaıdy. Sebebi ony iske asyrýǵa arnalǵan júzdegen normatıvtik aktiler qabyldanǵan. Sonyń saldarynan kóptegen jáıtter bir-birine qaıshy keledi. Ol zańnamany halyq ta, ınvestorlar da túsinbeıdi. Sondyqtan biz Qala qurylysy kodeksin ázirleýdi usynamyz. Ondaı tájirıbe kórshi Reseıde, Ázerbaıjanda, Estonııada, Germanııada, Ýkraınada, Ózbekstanda bar. Grýzııa da osy jumysqa kirisip ketti. Bizge de qalmaý qajet. Onymen biraz máselelerdi sheshýge bolady», - dedi Tasmaǵanbetov búgin Memlekettik qyzmet isteri jáne sybaılas jemqorlyqqa qarsy is-qımyl agenttiginde ótken selektorlyq jınalysta.
Onyń aıtýynsha, Astanada sáýlet jáne qala qurylysy salasyna qatysty aryz-shaǵymdar jyl saıyn kóbeıip keledi.
Búginde kásipkerler jer jáne qala qurylysy kadastarlaryn biriktirýdi usynyp otyr. Sonyń arqasynda qujat rásimdeýge ketetin biraz shyǵyndardy azaıtýǵa bolady.
