Qala qurylysy kadastrynyń derekterin tsıfrlandyrýǵa qomaqty qarajat bólinýde

ASTANA. QazAqparat - Qala qurylysy kadastrynyń derekterin tsıfrlandyrýǵa óńirler bóletin qarajat kólemi belgili boldy. Ony búgin Úkimet otyrysynda memlekettik qala qurylysy kadastryn tsıfrlaý jóninde baıandaǵan QR Investıtsııalar jáne damý mınıstri Jeńis Qasymbek jarııa etti, dep habarlaıdy QazAqparat. 

«Óńirler qala qurylysy kadastrynyń qolda bar aqparattyq resýrstaryn usyný, sondaı-aq ınjenerlik jeliler men kommýnıkatsııalardy túgendeýge qarajat bólý jumystaryn bastady. Búginde Kókshetaý, Aqtóbe, Atyraý qalalarynyń jáne Almaty oblysynyń Taldyqorǵan qalasy men 8 aýdan ortalyqtarynyń derekteri berildi. Qaraǵandy oblysy Qaraǵandy qalasynyń derekterin berdi. Batys Qazaqstan oblysy materıaldar berýge daıyndalýda jáne úsh jyl ishinde 1 aýdan ortalyǵynyń aýmaǵyn túgendeýge 225 mln teńge bóledi»,- dedi mınıstr.

Onyń aıtýynsha, aǵymdaǵy jyly Jambyl oblysy boıynsha 191 mln teńge jáne keıingi 3 jylǵa oblys aýmaqtaryn túgendeý úshin 725 mln teńge qarastyrylyp otyr. Al Qostanaı oblysy aǵymdaǵy jyly túgendeýge 100 mln teńge jáne kelesi jylǵa 252 mln teńge bólýdi josparlaǵan.

«Qyzylorda oblysy boıynsha barlyq qolda bar derekter tolyǵymen berildi. Mańǵystaý oblysy Aqtaý, Jańaózen qalalarynyń jáne 2 aýdan ortalyǵynyń derekterin berdi, basqa aýdandardy túgendeýge qarajat bóletin bolady. Pavlodar oblysy Pavlodar qalasy boıynsha ishinara derekter berdi, kelesi jyly túgendeýge 77 mln teńge bólý josparlanyp otyr», - dedi Jeńis Qasymbek.

Mınıstrdiń sózine qaraǵanda, Soltústik Qazaqstan oblysy Petropavl qalasy boıynsha ishinara derekter berip, aǵymdaǵy jyly túgendeýge 143 mln teńge, kelesi jylǵa 149 mln teńge bólmek. Shyǵys Qazaqstan oblysy Óskemen qalasynyń jáne oblystyq mańyzy bar 2 qala men 10 aýdan ortalyǵynyń derekterin, Ońtústik Qazaqstan oblysy Shymkent qalasynyń ishinara derekterin berdi. Astana jáne Almaty qalalary boıynsha derekter berilmedi.

Búgingi kúnde qala qurylysy kadastrynyń biryńǵaı júıesin qalyptastyrý aıasynda birqatar jumystar atqaryldy. Ekonomıkanyń negizgi baǵyttary boıynsha 35 myńnan astam nysan qamtylǵan 9 taqyryptyq qordan turatyn qala qurylysy kadastrynyń respýblıkalyq deńgeıi qurylyp, júrgizilýde. Joǵaryda aıtylǵandaı, qala qurylysy kadastrynyń oblystyq, aýdandyq jáne bazalyq deńgeıleri Qyzylorda oblysynda qalyptastyrylǵan. Atalǵan óńirde 5 jyl ishinde bir de eki myń masshtabty kadastrdyń tsıfrlyq derekterine jergilikti bıýdjetten 700 mıllıon teńgege jýyq qarajat bólindi»,- dedi mınıstr.

Foto: juddfire.com