Qala qurylysy kadastrynyń biryńǵaı júıesi qurylady - Parlament
ASTANA. 26 jeltoqsan. QazAqparat - Búgin QR Parlamenti Senatynyń Tóraǵasy Qasym-Jomart Toqaevtyń jetekshiligimen ótken palatanyń jalpy otyrysynda «Qazaqstan Respýblıkasynyń keıbir zańnamalyq aktilerine sáýlet, qala qurylysy jáne qurylys qyzmeti máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qaraldy.
Zań jobasy negizinen QR Prezıdentiniń Joldaýlarynda júktelgen mindetterdi atqarýǵa baǵyttalǵan. Osy maqsatta eldi mekenderdiń, ınjenerlik qurylystardyń jáne jelilerdiń, kóliktik jáne áleýmettik ınfraqurylymnyń jaı-kúıi týraly aqparattyń jedeldigin qamtamasyz etý sharalary kózdeledi. Bul rette memlekettik qala qurylysy kadastrynyń biryńǵaı júıesin qurý qarastyrylyp otyr. Bunymen qosa, avtorlyq qadaǵalaýdy júzege asyrý rásimderin retteý jáne nysandar qurylysyna arnalǵan aldyn ala jobalaý qujattamasynyń merzimin belgileý kózdeledi.
Sonymen qatar, zańnamada jobalaý aldyndaǵy (jobalaý-smetalyq) qujattamaǵa úsh jyl merzim belgileý usynylǵan. Sondaı-aq, sáýlet, qala qurylysy jáne qurylys isteri jónindegi ýákiletti organnyń quzyretinen avtorlyq qadaǵalaýdy uıymdastyrý jáne júrgizý qaǵıdalaryn bekitý fýnktsııalaryn alyp tastaý kózdeledi. Sonymen birge, memlekettik qala qurylysy kadastryna ákimshilik etýdi ortalyqtandyrý maqsatynda ony jergilikti atqarýshy organnyń qaraýynan sáýlet, qala qurylysy jáne qurylys isteri jónindegi ýákiletti organǵa vedomstvolyq baǵynysty memlekettik kásiporynnyń qaraýyna berý kózdelgen.
Budan bólek, qujatta qala qurylysynyń jańa júıesi ozyq tehnologııalardy paıdalana otyryp, jekeleı kásipkerler men halyqty qoljetimdi deńgeımen qamtamasyz etý qarastyrylady. Aqparattardyń jetkiliktiligi túrli ruhsattama júıeleriniń sonyń ishinde, jer telimin berý, qurylys salýǵa ruqsat berý, t.b. ýaqytyn qysqartýǵa múmkindik týǵyzady. Sonymen qatar sybaılas jemqorlyqtan saqtandyratyn jańa júıe. Bul basqa da memlekettik aqparattyq bazalarmen birge Elektrondyq úkimettiń quramdas bóligi bolyp tabylady.
