Qala kúnine oraı Almatyda jańa «Alataý» tennıs ortalyǵy ashylady
ALMATY. KAZINFORM - Alataý aýdanynda halyqaralyq standarttarǵa saı zamanaýı tennıs ortalyǵynyń resmı túrde ashylady.
Ol ITF jáne ATF deńgeıindegi respýblıkalyq jáne halyqaralyq týrnır ótkizýge yńǵaıly. Ortalyq aýmaǵynda tórt jabyq qatty jabyndy kort, tórt ashyq qatty jabyndy kort, alty topyraq jabyndy kort ornalasqan. Kórermen úshin ashyq alańdarda 150 oryndyq, ǵımarat ishinde 100 oryndyq trıbýna bar. Jańa ortalyqtyń jalpy aýmaǵy 5 myń sharshy metrden asady.
Kásibı sportshylarǵa da, ár jastaǵy áýesqoılarǵa da arnalǵan ortalyq halyq tyǵyz qonystanǵan aýdanda ornalasqan. Jattyǵý úshin bilikti jattyqtyrýshylar tartylyp, tennısshilerdi daıarlaýǵa jáne buqaralyq sportty damytýǵa jaǵdaı jasalady. Turmysy tómen otbasylardyń balalary úshin keminde eki top (árqaısysy 10 adamnan) tegin sabaqtar uıymdastyrylady. Sonymen qatar kópbalaly otbasylar men zeınetkerler jeńildikpen jattyǵa alady. Ortalyq tolyqtaı múmkindigi shekteýli azamattarǵa beıimdelgen.
Keshende medıtsınalyq kabınet, ashana, zamanaýı TechnoGym jabdyqtarymen qamtylǵan jattyǵý zaly, májilis zaly bar. Ortalyq kúnine keminde 400 sportshyny qabyldaı alady. Nysan qurylysy Qazaqstan tennıs federatsııasynyń qoldaýymen júzege asty.
Jobany júzege asyrý kúrdeli kezeńnen ótti. Qurylystyń alǵashqy kezeńi 2020 jyly bastaldy, alaıda merdiger uıym nysandy ýaqytynda tapsyrmady. Bul sotqa jetip, merdiger aıyppul arqalady. Keıin nysan «Tennıs Akademııasy» JShS-ine satyp alý quqyǵynsyz senimgerlik basqarýǵa berildi. Ol Qazaqstan tennıs federatsııasynyń jetekshiligimen qurylysty aıaqtady. Investıtsııa kólemi 1 mlrd teńge. Jumys «Elıt Inshaat» JShS-imen birlesip júrgizildi. Jer jáne tehnıkalyq qujattardy rásimdeýge baılanysty merzimniń uzartylǵanyna qaramastan, nysan oıdaǵydaı salyndy.
