Qyzylordada Dúnıejúzilik tazalyq kúnine oraı densaýlyq jáne demalys saıabaǵynda senbilik ótti
QYZYLORDA. KAZINFORM - Búgin Dúnıejúzilik tazalyq kúnine oraı Qyzylorda qalasyndaǵy Densaýlyq jáne demalys saıabaǵynda keń kólemdi senbilik uıymdastyryldy.
Aýqymdy sharaǵa oblystyq basqarmalar men mekemelerdiń qyzmetkerleri, jastar uıymdarynyń belsendileri, eriktiler, sondaı-aq qala turǵyndary qatysyp, qorshaǵan ortanyń tazalyǵy men kórkeıtilýine óz úlesterin qosty.
Shara barysynda saıabaqtyń barlyq aýmaǵy qamtylyp, qoqys jınaldy, aǵashtardyń túbi qopsytylyp, jasyl jelekter sýaryldy. Senbilikke qatysýshylar demalys oryndaryndaǵy oryndyqtardy tazalap synǵan aǵash butaqtaryn jınady. Sonymen qatar, jas kóshetter otyrǵyzylyp, gúlzarlar retke keltirildi. Bul jumystar saıabaqtyń kórkin arttyryp qana qoımaı, turǵyndarǵa jaıly demalys ornynyń qalyptasýyna yqpal etti.
Jastar belsendileri senbilik kezinde ekologııalyq mádenıetti nasıhattap, tabıǵatty qorǵaýdyń mańyzdylyǵyn túsindirdi. Olar qorshaǵan ortanyń tazalyǵyn saqtaý ár azamattyń mindeti ekenin, mundaı is-sharalar tek senbilik kúnderi ǵana emes, kúndelikti ádetke aınalýy kerektigin atap ótti.
Sharaǵa qatysýshylardyń aıtýynsha, mundaı senbilikter ujymdyq rýhty kóterip, adamdardy biriktirip qana qoımaı, ekologııalyq máselelerge beıjaı qaramaýǵa tárbıeleıdi. Sonymen qatar, qatysýshylar bul ıgi bastama jyl saıyn dástúrli túrde jalǵasyp, jańa býynǵa úlgi bolaryna senim bildirdi.
Dúnıejúzilik tazalyq kúni aıasynda ótken senbilik qorshaǵan ortany qorǵaý, tabıǵatty aıalaý, qalanyń sanıtarlyq jaǵdaıyn jaqsartý baǵytyndaǵy turaqty jumystyń bir bóligi sanalady. Osyndaı is-sharalar arqyly qoǵamda ekologııalyq jaýapkershilik kúsheıip, týǵan ólkeni qorǵaýǵa degen súıispenshilik arta túsedi.