Qala kúnine baılanysty Almatydaǵy birneshe kóshe 4 kúnge jabylady

ALMATY. KAZINFORM – Qyrkúıektiń úshinshi jeksenbisinde Almatyda qala kúni toılanady. Osyǵan oraı megapolıstiń Astana alańyndaǵy birneshe kóshe jabylady. Bul týraly Almaty qalasynyń ákimdigi habarlady. 

Qyrkúıektiń 12-si men 16-sy aralyǵynda Tóle bı kóshesiniń boıy Panfılov kóshesinen bastap Abylaı han dańǵylyna deıin jabylady. Bul aralyqtaǵy Astana alańynda qala kúnin merekeleý aıasynda uıymdastyrylatyn is-sharalarǵa daıyndyq jumystary júrgiziledi.

– Túsinistik tanytyp, jol júrý baǵytyn aldyn ala oılastyrýlaryńyzdy suraımyz. Sondaı-aq jol qozǵalysy erejelerin qatań saqtaýǵa shaqyramyz, - dep habarlady ákimdikten.

Aıta ketken jón, qala kúnin merekeleý aıasynda 14 qyrkúıek saǵat 16:00-de «Astana» alańynda LuxFM radıostantsııasynyń festıvali ótedi. Sahnada Mıras Júginisov, Aıqyn Tólepbergen, Jazzdauren, Adam jáne basqa da tanymal artıster óner kórsetedi. Keshtiń basty qonaǵy – Gremmı syılyǵynyń ıegeri, prodıýser – DJ Imanbek.

Sondaı-aq «Astana» alańynda estrada juldyzdarynyń qatysýymen Almaty Cover Show ótedi. Kontsert 17:00-de bastalady. Oǵan Naǵıma Esqalıeva, Meırambek Bespaev, Kalifarniya, RaiM, Nurlan men Murat, ARO, Erbolat Qudaıbergen, Qaırat Túntekov, Erkin Nurjanov, Aıdar Turǵanbaı jáne t.b. artıster qatysady. 

Eske salaıyq, buǵan deıin Almatyda qala kúninde qaıda barýǵa bolatynyn jazǵanbyz.