Qala kúnine oraı elordada «Sahnadan sálem!» halyqaralyq teatr festıvali óz shymyldyǵyn ashady
ASTANA. QazAqparat - Qala kúnine oraı 1 shildede «Sahnadan sálem!» halyqaralyq teatr festıvali óz shymyldyǵyn ashady. Kún saıyn qaladaǵy barlyq teatr sahnalarynda Túrkııa, Reseı men Qazaqstannyń shyǵarmashylyq ujymdarynyń spektaklderi qoıylady.
Bas qalaǵa barlyǵy 9 teatr trýppasy keledi. Bul týraly Astana qalasynyń 16 jyldyǵyna arnalǵan merekelik sharalardy
daıyndaý jáne ótkizý jónindegi uıymdastyrý komıtetiniń medıa-shtabynan habarlady.
Olardyń ishindegi eń aıtýlysy - Túrkııa Memlekettik teatrynyń «Merakı», qazaq tiline aýdarǵanda «Úreılený» maǵynasyn beretin qoıylym. Bul ómiri úreılenip júrip, aqyry túrli kúlkili oqıǵalarǵa tap bolatyn adam jaıly áserli ári jaıdarly komedııa. Keıipker aınaladaǵy bar nársege alańdaıdy, árneni bilgisi keledi. Sońynda, boıyn bılegen ólim men aýrýdan qorqý sezimi ony tyǵyryqqa tireıdi.
Sondaı-aq, Q.Qýanyshbaev atyndaǵy Memlekettik akademııalyq qazaq mýzykalyq-drama teatry sahnasynda: J. Aımaýytov atyndaǵy qazaq mýzykalyq-drama teatry (Pavlodar) «Ápkeniń álegi qoıylymymen; Mańǵystaý qýyrshaq teatry (Aqtaý) «Sdobnaıa Lıza - nastoıaşaıa koshka» qoıylymymen; A. Imanbaeva atyndaǵy teatrlandyrylǵan-mýzykalyq ortalyǵy (Almaty) «Medeıa» (komedııa) qoıylymymen;
M. Gorkıı atyndaǵy Memlekettik akademııalyq orys drama teatry sahnasynda: M. Gorkıı atyndaǵy Memlekettik respýblıkalyq orys drama teatry (Reseı, Daǵystan, Mahachkala) «Odoljıte tenora!» (komedııa) qoıylymymen; Oblystyq orys drama teatry (Qostanaı) «Hodıat slýhı» (komedııa) qoıylymymen; Aqmola oblystyq orys drama teatry (Kókshetaý) «Edıt Pıaf» (drama) qoıylymymen; S.Qojamqulov atyndaǵy qazaq mýzykalyq-drama teatry (Jezkazgan) «Ábilmansur» (tarıhı drama) qoıylymymen;
«Jastar» (Oqýshylar saraıy) teatry sahnasynda: Túrkııa memlekettik teatry «Meraki» (komedııa) qoıylymymen; G. Músirepov atyndaǵy balalar men jasóspirimder teatry (Almaty) «Kúshik kúıeý» (komedııa) qoıylymymen.
Halyqaralyq teatr festıvali aıasynda Astanaǵa barlyǵy 204 qatysýshy keledi. Festıval qonaqtary retinde tómendegi Reseı jáne Qazaqstannyń tanymal teatr synshylary shaqyryldy:
- Áshirbek Syǵaı - teatr synshysy, QR Eńbek sińirgen qaıratkeri, Verbıtskaıa Galına ıAkovlevna - Óner ınstıtýtynyń professory, teatry synshysy (Ýfa), Amankeldi Muqan - teatr synshysy (Almaty).
Qala kúni merekesi qarsańynda Astana teatrlary birqatar qoıylymdarynyń tusaýyn kesedi.
Q.Qýanyshbaev atyndaǵy Memlekettik akademııalyq qazaq mýzykalyq-drama teatry teatr festıvali aıasynda «Til tabysqandar» komedııasyn sahnalaıdy. Komedııa avtory ózbek dramatýrgy Mar Baıjıev, qoıylym rejısseri Bolat Uzaqov.
M.Gorkıı atyndaǵy Memlekettik akademııalyq orys drama teatry ızraıldyq Leon Agýlıanskııdiń «Torǵaıdyń uıasy» tragedııasynyń tusaýyn kesedi. Qoıýshy rejısseri - QR Eńbek sińirgen ártisi Bekbolat Parmanov.
«Jastar» teatry sahnasynda «Jer men kóktiń arasy» (avtory Mark Levın, rejısseri Dáýren Sergazın) qoıylymy kórsetiledi.
Astana qalasy Qýyrshaq teatry «Mereke» qoıylymyn sahnalaıdy.
Avtory K. Ejembekov, rejısseri K. Eshmuratova.
