Qala kúnine oraı Astanada iri qaıyrymdylyq marafony ótedi

ASTANA. 23 mamyr. QazAqparat - Álemniń qazirgi zamanǵy astanalarynyń óziniń «fırmalyq» marafondary bar. Marafondar qalany sport ortalyqtaryna aınaldyryp, ony keńinen tanymal jasaıdy. Qala kúni qarsańynda Astana qalasynyń ákimdigi Qazaqstan Respýbıkasyndaǵy eń mańyzdy jáne máni zor is-sharanyń biri - «Birinshi bolý - batyldyq!» Astana qaıyrymdylyq marafonyn ótkizýdi josparlap otyr. Bul týraly astana.kz saıty habarlady.

«Astana qaıyrymdylyq marafony shaharymyzdyń júgirýdegi dańqyn asyryp, ony álemdegi búgingi kúni jappaı júgirýden aıtarlyqtaı bedel jınaǵan Berlın, London, Boston nemese Máskeý marafondarymen teńestirýge múmkindik beredi»,- dep atap kórsetedi qala kúnine daıyndyq is-sharalaryn uıymdastyrýshylar.

Marafon ótkizýdegi maqsat - aımaqtaǵy múgedek jandarǵa qoldaý kórsetip, salaýatty ómir saltyn nasıhattaý bolyp tabylady.

«Marafonǵa qatysý úshin álemniń barlyq marafonshylary men bizdiń olımpıadashylar shaqyrylady. Sondaı-aq, oǵan 5000 qala turǵyny men qonaǵy qatysady dep josparlanýda. Árbir júgirýge qatysýshy kepka, fýtbolka men marafonnyń logotıpin alady. Qaıyrymdylyq marafonynyń uzaqtyǵy 42 shaqyrym 195 metrdi quraıdy. Atalǵan marafon aıasynda Qazaqstan estradasynyń tanymal ártisteriniń qatysýymen qyzyqty kontserttik baǵdarlama ótedi»,- dep sendiredi uıymdastyrýshylar.

Qaıyrymdylyq marafonyna qatysý úshin 1000 teńge kóleminde jarna tóleýi (jarna kólemi shekteýsiz bolýy múmkin) qajet. Kompanııalar men birlestikterge ujymdyq jarna qarastyrylǵan. «Jınalǵan qarajat elimizdegi múmkindigi shekteýli jandardy qoldaýǵa jiberiledi» - dep atap ótti marafondy uıymdastyrýshylar.

Marafon 1 shildedi ótedi. «Astana Báıterek» - elordanyń álemge áıgili rámizi. Marafonǵa qatysýshylardyń saıysy, mine, osy jerden bastalmaq. Ári qaraı jelaıaqtar Dostyq, Orynbor, Turar Rysqulov kósheleri, Qabanbaı batyr dańǵyly, Dinmuhamed Qonaev kóshesi, Turan dańǵyly, Áýejaı tas joly, Aınalma jol, «Telman», «Zarechnyı» turǵyn úı alaby, Kereı jáne Jánibek handar kósheleri boıynan júgirip ótedi. Aqtyq máre- «Máńgilik el» monýmenti alańy.

Degenmen, 42 shaqyrym 195 metr qashyqtyq tek qana marafonǵa qatysýshylarǵa arnalǵan. Qalǵandary marafonmen bir ýaqytta ótkiziletin 2400 metr qashyqtyqqa júgirýden baqtaryn synaıtyn bolady. Ákimshilik tarapynan Astanalyq qaıyrymdylyq marafonynyń jeńimpazyna Londonda ótetin «VirginLondonMarathon» marafonyna joldama beriledi.

Astanalyq qaıyrymdylyq marafony jyl saıyn ótkiziletin dástúrli sporttyq is-sharaǵa aınalmaq.