Qala kúni qarsańynda Stıven Sıgal Astanadaǵy jekpe-jekter óneri festıvaline qatysady
ASTANA. QazAqparat - Astanada Elorda kúnin merekeleý aıasynda jekpe-jekter óneriniń birinshi halyqaralyq festıvali ótedi, oǵan Gollıvýd akteri, aıkıdo aıkıkaıdyń jetinshi dan ıegeri Stıven Sıgal qatysady.
Bul týraly búgin OKQ-de ótken baspasóz konferentsııasynyń barysynda «Astana qalasynyń mádenıet basqarmasy» MM basshysy Bolat Majaǵulov habarlady.
«Astanada qala kúnin merekeleý aıasynda Gollıvýd juldyzy, Stıven Sıgal, akter, kásibı sportshy, «Boks álemi», «Qaharmandar eli» telejobasynyń júrgizýshisi Sergeı Badıýk, sondaı-aq kásibıler arasynda kıkboksıngten qazirgi chempıon Batý Hasıkovtyń qatysýymen ótetin jekpe-jekter óneriniń birinshi halyqaralyq festıvali josparlanǵan», - dep naqtylady B.Majaǵulov.
Uıymdastyrýshylardyń aqparatynsha, festıvalǵa AQSh, Qazaqstan, Qytaı, Reseı, Chehııa, Ońtústik Koreıa jáne Japonııa elderinen ózderi qatysatyn jekpe-jek túrlerindegi úzdik sheberler men eń joǵary belbeýler men dandardyń ıeleri qatysady. Aıkıdo, djıý-djıtsý, kapoeıra, býdzınkan, taı boksy, karate godzıý-rıý, shın kalı, kendo, taekvondo, vın-chýn, shaolın jáne qol jekpe-jegi sııaqty 12 tártip túri boıynsha kórneki jekpe-jekterdi ótkizý josparlanǵan.
Jekpe-jekter óneriniń festıvali 26 maýsym kúni Astanadaǵy «Dáýlet» Ulttyq tennıs ortalyǵynda ótedi.
Budan basqa, Astana kúnin merekeleý aıasynda 3 maýsym kúni elordada «M-1 Challenge 59 - Nomadtar shaıqasy - 5» aralas jekpe-jekten kezekti jarys bolyp ótedi. Bul keshtiń basty aıqasy - MMA aýyr salmaqtaǵy sportshylary Kennı Garner men Sergeı Harıtonovtyń jekpe-jegi bolmaq. Uıymdastyrýshylardyń sendirýinshe, bul aıqas jankúıerlerdiń arasynda úlken qyzyǵýshylyq týdyryp otyr.
