Qala kúni qarsańynda Astanada Keńes Dúısekeevtiń shyǵarmashylyq keshi ótedi
ASTANA. 4 maýsym. QazAqparat - Qala kúni qarsańynda astanalyqtarǵa teńdesiz tartýlar jasalatyn bolady.
Solardyń biri retinde Kongress-Holl sahnasynda týyndylary halyq júreginen oryn alǵan kompozıtor Keńes Dúısekeevtiń shyǵarmashylyq keshi ótpek. Bul týraly astana.kz saıtynda habarlandy.
Keńes Dúısekeev elge keńinen tanymal birqatar mýzykalyq shyǵarmalardyń, kınofılmder men teatrlyq qoıylymdar mýzykasynyń avtory. Onyń shyǵarmashylyǵy Qazaqstannan ózge halyqaralyq deńgeıde de keńinen tanymal. «Jaılaýdaǵy tań», «Kóshpendiler», «O, Týǵan jer» syndy kompozıtordyń biregeı týyndylary qazaq estradasynyń altyn qoryna engeni belgili.
Keńes Dúısekeevtiń ánine jazylǵan óleńder tyńdaǵan jannyń qulaq quryshyn qandyrardaı áýezdi, sondyqtan da bolar, onyń ánderi qazaq estradasy juldyzdarynyń arasynda úlken suranysqa ıe. Qazirgi tańda kompozıtor Qazaq Ulttyq óner ýnıversıtetiniń «Kompozıtsııa jáne opera-sımfonııalyq dırıjer» kafedrasynda jas tálimgerlerge dáris berýde.
Qala kúni qarsańynda ótetin kesh barysynda astanalyqtar men elorda qonaqtary qazaq estradasynyń jaryq juldyzdarynyń oryndaýyndaǵy Keńes Dúısekeevtiń ánderin tyńdaı alady. Shyǵarmashylyq keshtiń qonaqtary Roza Rymbaeva, Naǵıma Esqalıeva, Jubanysh Jeksenuly, Maqpal Júnisova, Mádına Sádýaqasova, Memlekettik fılarmonııa ártisteri jáne Astana qalasynyń estradalyq-sımfonııalyq orkestri bolmaq.
