Qala kúni: Almatyda dástúrli «Almaty Kóktóbe-Opera-2018» festıvali ótedi
ALMATY. QazAqparat - Almatyda qala kúni aıasynda 25-26 tamyzda dástúrli ashyq aspan astyndaǵy mýzykalyq festıval «Almaty Kóktóbe-Opera-2018» ótedi, dep habarlaıdy QazAqparat tilshisi.
«Bul - Qazaqstannyń ońtústik astanasyndaǵy eń mańyzdy festıvaldardyń biri. Munda operanyń úzdik solısteri men sheteldik juldyzdar óner kórsetedi. Sondaı-aq, Abaı atyndaǵy Qazaq Memlekettik Akademııalyq opera jáne balet teatrynyń sımfonııalyq orkestriniń súıemeldeýimen álemdik balettik nómirlerdi kórýge bolady», - dedi qalalyq Mádenıet jáne arhıvter basqarmasynan.
Dırıjer, QR eńbek sińirgen ártisi Alan Bóribaevtyń jetekshiligimen Abaı atyndaǵy Qazaq Memlekettik Akademııalyq opera jáne balet teatrynyń sımfonııalyq orkestri álemdik klassıkalyq mýzyka óneriniń týyndylaryn oryndaıdy.
Festıvalge Italııanyń tenory, «Opera Oskary» («Oscar Della Lirica») syılyǵynyń «Jańa urpaq» nomınatsııasy boıynsha jeńimpazy Vınchentso Konstantsa qonaq bolady.
Eske sala ketsek, Almaty kúnin merekeleý aıasynda megapolıste 100-den astam is-shara josparlanǵan. Baǵdarlamada budan ózge Halyqaralyq «ARTBAT fest» zamanaýı óner festıvali, ashyq aspan astyndaǵy «Orkestrler festıvali», «KITAP FEST» kitaptar festıvali, «Family Festival» atty otbasy kúni, halyqaralyq «Almaty garden show» baqshalar festıvali, Qazaqstandyq «GAKKU daýysy» mýzykalyq festıvali, qalalyq dástúrli «ALMA Fest» alma festıvali ótedi.
