Qala kósheleri durys tazalanbaıdy – Oral ákimdigi jaýap berdi
ORAL. KAZINFORM – Oral qalasynda turǵyndardyń kóshelerdi shań, balshyq pen qardan tazalaýǵa qatysty shaǵymy jyl saıyn kóbeıýde. Bul týraly zańger, BQO qoǵamdyq keńesiniń múshesi Baýyrjan Ahmetjan Feısbýk áleýmettik jelisindegi paraqshasynda málim etti.
Onyń aıtýynsha, qalany keminde úsh aýdanǵa bólip, «Jaıyq Taza qala» JShS-nyń monopolııasyn azaıtyp, básekeles kompanııalarmen qyzmettiń sapasyn kóterý – basty másele.
«Mysaly, byltyr 22 qarashada qalaǵa kútpegen jerden qys kelip, qarly boran bárin sastyrdy. Bıyl 5 qarashada dál sondaı kollaps qaıtalanyp, ádettegideı «Jaıyq Taza qala» JShS buǵan taǵy da daıyn bolmady. Sońǵy toǵyz jylda Oralda kóshe-jol jelisin kútip ustaý jáne qalany sanıtarlyq tazalaý jumystaryn (kósheni jýý, sypyrý, joldy jazda, qysta tazalaý, qar jınaý jáne basqa) tek qana bir kompanııa-monopolıst, BQO máslıhatynyń depýtaty Turarbek Tilemisovke tıesili «Jaıyq Taza qala» JShS atqaryp keledi», deıdi BQO qoǵamdyq keńesiniń múshesi.
Onyń sózine qaraǵanda, goszakup.gov.kz málimetine sáıkes «Jaıyq Taza qala» JShS joldy kútip ustaý jáne tazalaý úshin 2016-2024 jyldary bıýdjetten 25,4 mlrd teńgege kelisim-shartqa otyrǵan. Memlekettik mekemelermen kelisilgen 111 sharttyń 66-sy bir kózden jasalǵan. Mysaly, negizgi tapsyrys berýshi Oral qalasy turǵyn úı-kommýnaldyq sharýashylyq bólimi atalmysh mekememen 2023 jyly 7,4 mlrd teńgege úsh shart jasaǵan, munyń merzimi bıylǵy 31 jeltoqsanda aıaqtalady. Bıyl 1,1 mlrd teńgege osy «Jaıyq Taza qala» JShS-men Zachagan jáne Krýgloozernyı ákimdikteri jáne basqalar kelisimge otyrǵan.
«Sonymen, «Jaıyq Taza qala» tapsyrys berýshilerdiń «eń súıikti» merdigeri me? Álde basqalar buny jasaı almaıdy ma? Al, monopolıst bolǵannyń bir jamany - ózimshildik pen jumystyń sapasyn kóterýge yntanyń bolmaýy. Eger mekeme qojaıyny 9 jyldan beri depýtat bolsa, 9 jyl boıy kompanııasy tenderdi alyp otyrsa, basqa bıznesti ákimdik damytpasa, qalaı ynta bolady? Meniń oıymsha, qalany birneshe bólikke bólip, ony merdigerdiń aýmaǵy etip bekitý tazalyqtyń kepili ári qoǵamdyq baqylaý júrgizýge yńǵaıly. Birneshe merdigerdiń oblys ortalyǵyn tazalaýy básekelestik pen qyzmettiń sapasyn arttyratyny sózsiz», deıdi B.Ahmetjan.
Osy máselege baılanysty Kazinform tilshisiniń saýaldaryna Oral qalasy ákimdigi jaýap berdi.
Ákimdik básekelestik ortany arttyrý maqsatynda «Jaıyq Taza qala» JShS-nyń 2018 jyly tolyǵymen jeke menshik ıesine satylǵanyn, quryltaıshysy T.Tilemisov ekendigin jetkizdi.
Ákimdik málimetine qaraǵanda, kásiporyn jol-kópir sharýashylyǵyn kútip ustaý, ortalyqtandyrylǵan sanıtarlyq tazalaý, aıaldama pavılondaryn jýý, qısyq syzyqty qorshaýlardy ornatý, dánekerleý, aryqtar men sý ótkizetin qubyrlardy tazalaý, aǵash kesý, gúl egý, sýarý, sý tasqynynyń aldyn alý jumystaryn júrgizedi.
Kásiporynnyń balansynda ákimshilik ǵımarattary, mashınalar men mehanızmderdi jóndeýge jáne qyzmet kórsetýge arnalǵan bokstary, tehnıkanyń turýyna arnalǵan qoıma úı-jaılary men aýmaqtary bar. Kommýnaldyq jáne jol tehnıkasynyń jalpy sany – 218.
«Oral qalasynyń kóshe-jol jelisin kútip ustaý jáne qalany sanıtarlyq tazalaý jumystaryn atqaratyn merdigerdi anyqtaý maqsatynda memlekettik satyp alý portalyna habarlama berilip, tehnıkalyq talaptar qoıylady. Konkýrstyń qorytyndysyna sáıkes «Jaıyq Taza qala» JShS mekemesimen 2016 jyldan beri jalpy 24,5 mlrd teńgege kelisim-shart jasaldy. Bul jerde atap ótetin jaıt, qalamyzda tehnıkalyq talaptarǵa sáıkes keletin, kórsetilgen jumysty atqarýǵa áleýeti jetkilikti mekeme az nemese konkýrsqa qatyspaıdy. Sondyqtan 8 jyldan beri kóshe-jol jelisin kútip ustaý jáne qalany sanıtarlyq tazalaý jumystaryn tek bir kásiporyn «Jaıyq Taza qala» JShS atqarýda. Qoldanystaǵy zańnamada kórsetilgen avtomobıl joldaryn jóndeý men kútip-ustaýdy qarjylandyrý normatıvterine sáıkes, Oral qalasynyń avtomobıl joldaryn kútip-ustaý úshin bir jylǵa 7 mlrd qarajat qajet. Alaıda merdiger mekemege atalǵan jumysty oryndaý úshin bıýdjetten mundaı qarajat bólinbeıtinin atap ótken jón», delingen ákimdik jaýabynda.
Oral qalasy ákimdigi qar jaýǵan kezde aldymen magıstraldyq kósheler, sodan keıin basqalary tazalanatynyn eske saldy.
Qala aýmaǵynyń úlkeıýine baılanysty 2019 jyldan bastap qalaǵa qarasty Zachagan, Derkól, Krýgloozernyı, Jelaev kentterinde kóshe-jol jelisin kútip ustaý jáne qalany sanıtarlyq tazalaý jumystaryn júrgizý maqsatynda bólek konkýrstar jarııalandy. Odan bólek, 2024 jyldan bastap buryn sanıtarlyq tazalaýda bolǵan aǵashtardy kútip-ustaýǵa arnalǵan jumystarǵa bólek konkýrstar ótkizilip, Zachaganda «Táýekel» JShS jáne Derkól kentinde «Belyı Parýs» JShS jeńimpaz atandy.
«2023-2024 jylǵa qala aýmaǵyn kútip ustaýdy qamtamasyz etý sharty aıaqtalady. Soǵan baılanysty 2025-2026 jyldarǵa beriletin baıqaýda Oral qalasynyń kóshe-jol jelisin kútip ustaý jáne qalany sanıtarlyq tazalaý jumystarynyń ishinen shahar aýmaǵynda iri kólemdi qaldyqtardy jınaý jáne shyǵarý jumystary bólek shyǵarylyp, 6 bólikke bólinýde. Sáıkesinshe 6 merdiger qala aýmaǵynda iri kólemdi qaldyqtardan tazartatyn bolady», dep túıindedi qala ákimdigi.
Eske sala keteıik, budan buryn Oral qalasynda kóshe joldary qardan qalaı tazartylmaqshy ekendigin jazǵan bolatynbyz.
