Qala qoqysqa toldy: Oral ákimdigi jaýap berdi

ORAL. KAZINFORM – Áleýmettik jelide Oral qalasynyń ortalyq aýdany qoqysqa tolǵany jóninde beınejazba jarııalandy.

Aıbolat Bókenovtiń Facebook áleýmettik jelisinde málim etkenindeı, qaladaǵy qatty turmystyq qaldyqty tazalaý boıynsha tenderden «Stroı Kompas» JShS utyp alǵan.

Qala turǵyny ózi kúnde ótetin Ámbebap shaǵynaýdany K.Meńdálıev kóshesi 2-mekenjaıy tusynda qatty turmystyq qaldyqtardyń jınalmaı jatqanyn aıtady. Ǵ.Qurmanǵalıev kóshesi 3, H.Chýrın kóshesi 119-úı mańy da osyndaı kúıde.

- Qatty turmystyq qaldyqtardy jınaıtyn «Stroı Kompas» mekemesiniń tehnıkasy, jumysshylary bar ma? Qalamyz qoqysqa toldy ǵoı, - deıdi A.Bókenov.

Osy máselege baılanysty Oral qalasy ákimdigi jaýap berdi.

Ákimdikten túsken málimetke qaraǵanda, iri kólemdi qaldyqtardy jınaý-shyǵarý boıynsha memlekettik satyp alý portaly arqyly qala alty ýchaskege bólinip, jalpy konkýrs jarııalandy.

- Nátıjesinde 5 ýchaske boıynsha «Stroı Kompas» JShS, bireýi boıynsha «Jaıyq taza qala» JShS utyp aldy. Konkýrstyń ótýi kezinde 1-2 kún jumys toqtap qaldy. Qazirgi ýaqytta merdigerler jumystaryn bastady. Qala boıynsha iri kólemdi qaldyqtardy shyǵarý qarqyndy júrgizilip jatyr. «Stroı Kompas» JShS-da keminde 10 tonna júk tıeıtin 20 samosval, 20 tıeýshi-traktor, 15 brıgadır, 50 jumysshy bar, - dep habarlady Oral qalasy ákimdiginen.

Eske sala keteıik, budan buryn Oralda tender ótkizý kezinde básekelestikke qarsy áreketke jol berilgenin jazǵan edik.

Sondaı-aq Oralda quny 5,3 mlrd teńgege baǵalanǵan eki konkýrstyń kúshi joıyldy.