Qala keptelisterden 600 mln teńge joǵaltady - Baıbek
ALMATY. QazAqparat - Almaty ákimi halyqpen esepti kezdesýi barysynda Baýyrjan Baıbek qalanyń ekologııalyq ahýalynyń túıtkildi máselelerin tilge tıek etti, dep habarlaıdy QazAqparat tilshisi.
«Birinshi kezekte Almatyny turǵyndarǵa yńǵaıly qala etý úshin ınvestıtsııalyq tartymdylyǵy men ınnovatsııalyq jańǵyrýyn qamtamasyz etýimiz kerek. Ózderińiz bilesizder qalanyń aýa basseınin kepteliste turǵan kólikter lastap jatyr. Qym-qýyt sátterde 700 myń kólik saǵatyna 19 shaqyrym júredi eken. Al Býdapeshtte bul kórsetkish 1,5 ese jyldam. Almaty ekonomıkasy keptelisterdiń kesirinen 600 mln teńge, nemese 2 mln dollar joǵaltyp otyr», - dedi Almaty ákimi.
Qala basshysy bul máseleniń sheshýi bir kúnniń jumysy emestigin aıtty.
«Osy baǵytta «Falkon Evrobas» kompanııasy elektrobýs shyǵarý boıynsha zaýyt qurylysyn bastamaq. Bul zamanaýı kólikter Eýropada da joq. Mundaı elektrobýstar shetelge eksporttalatyn bolady. Sonymen qatar, bıyl BRT jolynyń 8,7 shaqyrymdyq birinshi kezegin bastadyq. 22 shaqyrym bolatyn tolyq dáliz 2020 jyly aıaqtalatyn bolady. Memlekettik-jekeshelik áriptestik aıasynda jeńil relsti kólik jelisi salynady. Úlken Almaty aınalma jolynyń qurylysy bıyl bastalady. Bıyl Abaı kóshesin sozý jumystary qolǵa alynbaq. Sońǵy 10 jylda 130 jolaıryǵy paıdalanýǵa berilgen. Osy jumystyń barlyǵy qala kóshelerindegi kólikterdiń sanyn 40-60 myńǵa azaıtpaq»,-dedi shahar basshysy.
Sonymen qatar, shahar basshysy bıyl qala ishindegi jeke sektordarǵy úıler - tolyq, al Almaty oblysynda 4000 úı kógildir otynǵa qosylatynyn aıtty.
