Qala kelbeti jańaryp keledi: Jezqazǵandaǵy negizgi jobalar
JEZQAZǴAN. KAZINFORM - 2025 jyl Jezqazǵan qalasy úshin abattandyrý jáne kógaldandyrý jyly boldy. Qala aýmaǵynda saıabaqtar men qoǵamdyq keńistikterdi jańǵyrtý, turǵyn úılerdiń qasbetterin jaqsartý jáne ınfraqurylymdy damytý baǵytynda aýqymdy jumystar atqaryldy.
Alashahan dańǵyly boıyndaǵy jaıaý júrginshiler aımaǵy abattandyryldy. Qalada 31 jańa balalar oıyn alańy ornatylyp, 8 alań qalpyna keltirildi. Sonymen qatar, 100 qoqys konteıner alańy abattandyrylyp, 400 konteıner aýystyryldy.
Aýlaishilik jaryqtandyrýdy jaqsartý maqsatynda 105 kóshe shamy men jaryqtandyrý tirekteri ornatyldy. «Qazaqmys» korporatsııasynyń qoldaýymen 40 kópqabatty turǵyn úıdiń qasbeti jańartyldy. Momyshuly kóshesindegi saıabaqty abattandyrý jumystary aıaqtalýǵa jaqyn.
Qalanyń damýy jańa Batys aýdanymen jalǵasyp jatyr. Bas josparǵa sáıkes bul aýmaqta áleýmettik nysandar men zamanaýı turǵyn úı keshenderi salynady. Bolashaqta munda 12 myńnan astam turǵyn ómir súredi dep josparlanǵan.
Sáýlettik kelbet pen qala qurylysy josparlaý baǵytynda batys aýdanda magıstraldyq jylý, sý jáne káriz jelileriniń qurylysy jalǵasyp jatyr. Sonymen qatar qaladaǵy tórt aýdannyń egjeı-tegjeıli josparlaý jobalary ázirlenip jatyr.
Jezqazǵan qalasynyń bıýdjeti men ınvestıtsııalyq áleýeti artyp kele jatqanyn jazǵan edik.