Qala balalary aýylda 20 kún turyp qazaqsha úırendi: ShQO-daǵy jańa joba kelesi jyly da jalǵasady

ÓSKEMEN. QazAqparat – Shyǵys Qazaqstan oblysynda oqýshylarǵa qazaq tilin úıretý maqsatyndaǵy «Qonaqjaı otbasy» jobasy kelesi jyly da jalǵasatyn boldy, dep habarlaıdy QazAqparat tilshisi.

Elimizde alǵash ret qolǵa alynyp otyrǵan «Qonaqjaı otbasy» jobasy aıasynda qala balalary Katonqaraǵaı aýdanyndaǵy aýyldarǵa baryp, 20 kún turyp qaıtty.

Tildik ortaǵa enip, aýyldyń tynys-tirshiligimen tanysty.

Búgin Óskemende ótken dástúrli tamyz konferentsııasynda jobanyń qorytyndysy shyǵarylyp, aldaǵy ýaqytta qalaı jalǵasatyny sóz etildi.

ShQO bilim basqarmasynyń basshysy Innesa Chernyshevanyń aıtýynsha, alǵashqy 10 kúnnen keıin balalar qazaqsha sóıleı bastaǵan.

«Jobaǵa barlyǵy 12-14 jas aralyǵyndaǵy 67 bala qatysty. Olar aýyldaǵy otbasylardyń úılerinde turyp, til úırendi. Nátıjeleri óte jaqsy. Aýyldarda arnaıy shtab ta jumys istedi. Onyń quramyna polıtseıler, psıhologtar men muǵalimder kirdi. Al ata-analar úshin WhatsApp jelisinde top qurylyp, kúnine eki ret esep jiberildi», - deıdi ol.

Oblys ákimi Ermek Kósherbaev kelesi jyly bul joba tek Katonqaraǵaıda emes, Shyǵys Qazaqstannyń barlyq aýdanynda júzege asatyndyǵyn jetkizdi. Ár aýdannyń múmkindikteri, erekshelikteri eskerilip, ustazdar qaýymy usynys-tilekterin bildire alady.

«Bul jańa joba kóptiń kóńilinen shyqty. Tipti elimizdiń basqa aımaqtarynda da qyzyǵýshylyq týdyryp otyr. Sol úshin ony ary qaraı jalǵastyrýymyz qajet», - dedi ákim.

Eske salsaq, ShQO-da «Qonaqjaı otbasy» jobasy aıasynda qala balalary aýylda 20 kún turyp, qazaq tilin úırenetindigin habarlaǵan edik.