Qala aýmaǵynda eshqandaı tótenshe jaǵdaı tirkelgen joq — Almaty ákimdigi
ALMATY. KAZINFORM — Almatyda jańbyrly aýa raıyna baılanysty tótenshe jaǵdaı qyzmetteri kúsheıtilgen jumys rejımine kóshirildi. Bul týraly qala ákimdigi habarlady.
Ákimdiktiń málimetinshe, Almaty tótenshe jaǵdaılar departamentiniń bólimsheleri táýlik boıy kúsheıtilgen rejımde jumys istep jatyr.
Qutqarýshylar Úlken Almaty, Kishi Almaty jáne Qarǵaly ózenderindegi ahýaldy úzdiksiz baqylaýda ustap otyr. Monıtorıng beketterinen jaǵdaı týraly aqparat saǵat saıyn qabyldanady. Sonymen qatar sýdyń erkin aǵýyn qamtamasyz etý maqsatynda Aqsaı ózeniniń arnasy aldyn ala tazartylǵan.
— Jaýyn-shashyn bastalǵanǵa deıin sý basý qaýpi joǵary aýmaqtarǵa qala ákimdiginiń merdiger uıymdarynyń, qutqarý qyzmetiniń jáne tótenshe jaǵdaılar departamentiniń arnaıy tehnıkasy men jeke quramy aldyn ala ornalastyrylǵan. Bul jaǵdaı kúrdelengen jaǵdaıda jedel áreket etýge múmkindik beredi, — delingen habarlamada.
Ákimdiktiń habarlaýynsha, qazirgi ýaqytta qala aýmaǵynda eshqandaı tótenshe jaǵdaı tirkelgen joq. Qutqarý qyzmetteri turǵyndardyń qaýipsizdigin qamtamasyz etý úshin táýlik boıy kezekshilikti jalǵastyryp jatyr.
Aıta keteıik, 1 shilde kúni Úlken Almaty ózeninde sý deńgeıi kóterildi. Sondaı-aq Aqsaı ózeni arnasynan shyqty. Qala turǵyndary tabıǵı qubylystyń saldaryn áleýmettik jelide bólisip jatyr.
Eske salaıyq, buǵan deıin Úlken Almaty ózeni arnasynda granıt tastarǵa zaqym kelgenin habarlaǵanbyz. Bul jaǵdaıǵa baılanysty Almaty ákimdigi túsinik berdi.
