Qala arasynda qatynaıtyn elektr poıyzdarynda býfet ashyldy

ASTANA. KAZINFORM – Ulttyq tasymaldaýshynyń elektr poıyzdarynda býfet ashyldy. Jolaýshylar endi jeńil tamaqtana alady. Bul týraly «Jolaýshylar tasymaly» AQ baspasóz qyzmeti málimdedi.

№ 6829/6830 «Astana-Kókshetaý» jáne № 6803/6804 «Astana-Atbasar» baǵyttarynda qatynaıtyn elektr poıyzdarynda jolaýshylarǵa jol barysynda jeńil tamaqtanýǵa arnalǵan býfetter ashyldy.

«Býfet vagonynda ystyq taǵamdar qarastyrylmaǵan, alaıda jolaýshylarǵa kúndelikti qoljetimdi baǵamen jańa pisken nan-toqash ónimderi, sýsyndar, jeńil taǵamdar, shokolad jáne ystyq sýsyndar usynylady. Bul assortıment jolaýshylarǵa jol boıynda jeńil tamaqtanyp, sapardy odan ári yńǵaıly ótkizýge jaǵdaı jasaıdy», — delingen habarlamada.

Býfet vagondary elektr poıyzdarynyń sapary kezinde jol boıy jumys isteıdi. Býfet vagonynda bir jolaýshyǵa arnalǵan ortasha chek, sýsyndardy qosa alǵanda 700–1000 teńge shamasynda bolady.

Aıta keteıik, № 6829/6830 «Astana-Kókshetaý» jáne № 6803/6804 «Astana-Atbasar» baǵyttaryndaǵy elektr poıyzdarynyń jol júrý ýaqyty shamamen 4 saǵatty quraıdy.