Kalıan týberkýlez, qolqa jáne obyr dertine soqtyrady - Densaýlyq saqtaý mınıstrligi
ASTANA. 6 aqpan. QazAqparat - Kalıan týberkýlez, qolqa jáne obyr dertine ákep soqtyrady. Bul týraly búgin QR Densaýlyq saqtaý mınıstrliginde «Kalıan týraly shyndyq» atty dóńgelek ústelde eldiń bas sanıtarlyq dárigeri Jandarbek Bekshın málim etti.
«Densaýlyq saqtaý mınıstrligi kalıanǵa qatysty ekspress-zertteý jasady jáne onyń alǵashqy nátıjeleri bizdi tańqaldyrdy. Kalıannan ishek jáne kók irińdi taıaqshalar, zeń, ashytqysh sańyraýqulaqtar, stafılokokk aýreýs tabyldy. Zertteý áli jalǵasýda. Bul jumystar 2000 jyldan beri ótkizilýde. Halyqaralyq aqparattyq jýrnaldarda jarııalanǵan ǵylymı eńbekterde atalyp ótkenindeı, kalıan sýynda joǵaryda atalǵan bakterııalardan bólek, týberkýlezdyń koh taıaqshalary, gepatıt vırýstary bar ekendigi anyqtalǵan», - dedi J.Bekshın.
Bas sanıtarlyq dárigerdiń atap ótkenindeı, qoǵamdyq oryndarda, meıramhana, dámhanalarda kalıan dezınfektsııalanbaıdy. Sondyqtan onyń qaýiptiligi birneshe ese joǵary bolyp otyr. «Kalıandy qoǵamdyq oryndarda tazalyqta ustap otyrý tipti múmkin emes. Zertteý boıynsha, kópshilik otyratyn jerlerde kalıandardy árdaıym zararsyzdandyrylmaıtyndyǵy anyqtaldy», - deıdi J.Bekshın.
Onyń aıtýynsha, qoǵam arasynda kalıan sýy tútinniń barlyq zııandy elementterin súzip otyrady degen jalǵan túsinik qalyptasqan.
«Sý súzgi bola almaıdy. Tútinmen keletin benzol, benzpıren, sonyń ishinde nıkotın syndy ýly zattar organıkalyq bolyp tabylatyndyqtan, sýda múldem erı almaıdy. Kerisinshe, keıbir mıkroorganızmder sýly jerde tez damyp, kóbeıedi. Al 600-650 gradýsta bolǵan bul zattar ókpeniń eń tereń tustaryna deıin jetip, baýyrdy, ókpeni, búırekti, júrekti zaqymdaıdy. Sondyqtan biz kalıandy adam densaýlyǵyna zor zııan tıgizedi dep esepteımiz», - dep atap kórsetti ol.
Dóńgelek ústelde sarapshylar keltirgen málimetter boıynsha, sonymen qatar kalıan tútini aýyz qýysynyń shyryshty qabyqtaryna tereń enip, aǵzanyń basqa da múshelerine taraıdy. Denege taralǵan konseragender onkologııalyq aýrýlarǵa ákep soqtyrady.
