Qaqtyǵysty toqtatý múmkindigi: Zelenskıı men Tramp ne deıdi
VAShINGTON. KAZINFORM — AQSh prezıdenti Donald Tramp Ýkraına prezıdenti Vladımır Zelenskııdi Aq úı aldynda qarsy aldy. Olar sálemdesip, jýrnalısterdiń suraqtaryna jaýap berdi, dep habarlaıdy VVS.
Kezdesý barysynda Ýkraına prezıdenti Vladımır Zelenskıı Kıevtiń AQSh-qa «myńdaǵan» ýkraınalyq drondardy berýge daıyn ekenin, al onyń ornyna Tomahawk qanatty zymyrandaryn alǵysy keletinin aıtty. Ol qazirgi zamanǵy soǵystarda ushqyshsyz apparattardyń (BPLA) kóp bolýy qajet ekenin atap ótti.
Donald Tramp ýkraın drondaryn «óte jaqsy» dep baǵalady. Sonymen qatar, ol AQSh-tyń ózi de Tomahawk jáne basqa da zymyrandarǵa muqtaj ekenin aıtty, biraq Zelenskııdiń usynysyn talqylaýǵa daıyn ekenin jetkizdi.
Jýrnalıster Tramptan Majarstanda Reseı prezıdenti Vladımır Pýtınmen ótetin kezdesý týraly surady.
AQSh prezıdenti Majarstan premer-mınıstri Vıktor Orbandy maqtady.
— Majarstan — qaýipsiz el, olar óte jaqsy jumys atqaryp jatyr. Vıktor Orban — óz elin basqarý jaǵynan óte jaqsy kóshbasshy. Basqa elderde kezdesetin kóptegen másele ol jaqta joq. Ol jaqsy uıymdastyrýshy bolady dep oılaımyn, — dedi Tramp.
Keıin jýrnalıster Tramptan bul kezdesýde Zelenskıı bola ma dep surady. Ol bul suraqtyń áli naqty sheshilmegenin aıtyp, Pýtın men Zelenskııdiń arasynda pikir qaıshylyǵy bar ekenin jetkizdi.
— Biz barlyq taraptyń ózderin jaıly sezingenin qalaımyz, — dedi Tramp. — Biz úshjaqty kezdesý ótkizýdi josparlap otyrmyz, biraq, múmkin, árqaısymen jeke-jeke kezdesemiz. Menińshe, ekijaqty kezdesý bolýy yqtımal.
TASS agenttiginiń habarlaýynsha, sonymen qatar Tramp Úndistannyń Reseıden munaı satyp alýdy tolyq toqtatatynyn málimdedi.
— Úndistan endi Reseıden munaı satyp almaıdy, — dedi ol Aq úıde Vladımır Zelenskıımen kezdesýde. — Olar (úndister) qazirdiń ózinde [satyp alý kólemin] azaıtyp jatyr. Olar bul úrdisten ketip jatyr. Buryn olar [Importtalatyn úndi munaıynyń] 38%-yn Reseıden alatyn, endi ondaı bolmaıdy.
AQSh prezıdenti sondaı-aq ATES sammıtinde Qytaı tóraǵasy Sı Tszınpınmen kezdesý jospary saqtalyp otyrǵanyn málimdedi.
— Biz birneshe aptadan keıin Ońtústik Koreıada kezdesemiz, — dedi Tramp.
Budan bólek AQSh basshysy Qytaı tóraǵasy Sı Tszınpınmen kezdesýine deıin qaqtyǵystyń (Ýkraınadaǵy) aıaqtalatynyna úmit bildirdi.
Jýrnalıster odan aldaǵy birneshe apta ishinde Ońtústik Koreıada ótetin ATES sammıti aıasyndaǵy kezdesýde Sı Tszınpınnen Ýkraınadaǵy qaqtyǵysty retteýge kómektesýdi suraı ma dep saýal joldady.
— Men bul máseleni talqylaımyn. Biraq maǵan Ýkraınadaǵy qaqtyǵys sol kezdesý ótkenge deıin aıaqtalsa óte jaqsy bolar edi. Meniń oıymsha, eger taraptar ıkemdilik tanytsa... soǵysty jyldam aıaqtaı alamyz degen úmit bar, — dedi AQSh prezıdenti sóılemin tolyq aıaqtamaı.
Eske salsaq, osyǵan deıin Vladımır Zelenskıı Vashıngtonǵa barǵanyn jazǵan edik. Ol aldymen AQSh-tyń qorǵanys jáne energetıka kompanııalarynyń ókilderimen, odan keıin prezıdent Donald Tramppen kezdesetini aıtyldy.