Qaqtyǵysty azaıtý úshin Qytaı Taıaý Shyǵysqa arnaıy elshisin jiberedi

ASTANA. KAZINFORM – Qytaı úkimeti shıelenisti báseńdetýge kómektesý úshin Taıaý Shyǵysqa arnaıy ókil jiberýdi josparlap otyr. Bul týraly beısenbi kúni Syrtqy ister mınıstrliginiń resmı ókili Mao Nın málimdedi, dep habarlaıdy Kazinform agenttiginiń Beıjińdegi tilshisi.

Qytaı bıligi shıelenistiń ýshyǵýyna baılanysty alańdaýshylyq tanytyp, deldaldyq áreketterin kúsheıtti. Qytaı Syrtqy ister mınıstri Van I Reseı, Iran, Izraıl, Saýd Arabııasy, Birikken Arab Ámirlikteri, Oman, Frantsııa jáne basqa elderdiń syrtqy ister mınıstrlerimen telefon arqyly birneshe ret sóılesti.

Kelissózder barysynda Qytaı tarapy BUU Jarǵysynyń qaǵıdattaryn saqtaý qajettigin atap ótip, qaqtyǵysqa qatysýshy taraptardy kelissózge qaıta oralýǵa, beıbit turǵyndardyń qaýipsizdigin qamtamasyz etýge jáne shıelenistiń odan ári órshýine jol bermeýge shaqyrdy. Sonymen qatar Qytaı kúsh qoldanýǵa qarsy ekenin málimdedi.

Qytaı Syrtqy ister mınıstriniń resmı ókili Mao Nınniń aıtýynsha, Qytaı barlyq múddeli taraptarmen, onyń ishinde qaqtyǵysqa qatysýshylarmen baılanystardy saqtap, deldaldyqty kúsheıtip, kelisimge qol jetkizýge umtylyp jatyr. 

Sonymen qatar jaqyn arada Qytaı úkimetiniń Taıaý Shyǵystaǵy arnaıy ókili Chjaı Tszıýn aımaqqa baryp, shıelenisti tómendetý baǵytynda belsendi sharalar qabyldamaq. Bul qadam Qytaıdyń aımaqtaǵy turaqtylyqty qamtamasyz etýge degen nıetin kórsetedi.

Eske sala keteıik, budan buryn Eýropa qaqtyǵystyń ýshyǵýyna baılanysty Taıaý Shyǵystan azamattaryn evakýatsııalaıtynyn jazǵan edik.