Qaqtyǵys jaǵdaıynda álemde jappaı qyryp-joıatyn qarýdy paıdalaný qaýpi bar — Roman Vasılenko

ASTANA. KAZINFORM — Qazir álemde geosaıası shıelenis kúsheıip kele jatqan kezeńde ıadrolyq qarýdyń adamzat úshin úlken qaýipi bar. Bul týraly Syrtqy ister mınıstriniń orynbasary Roman Vasılenko málim etti. 

— Astana halyqaralyq forýmynda Prezıdent toǵyz eldiń arsenalynda jalpy sany 13 myń ıadrolyq oqtumsyq bar ekenin atap ótti. Bul jaǵdaı barshamyz alańdatyp otyr. Osy qarý túrin bireýler qatelesip nemese qaqtyǵys jaǵdaıynda paıdalaný qaýpi bar ekenin umytpaý kerek. Álemdegi aýqymy boıynsha tórtinshi arsenaldan bas tarqan jáne Semeı ıadrolyq synaq polıgonyn óz erkimen japqan el retinde adamzat osy qarýdyń qaterine úlken jaýapkershilikpen qaraýy tıis dep sanaımyz, — dedi Roman Vasılenko Astana halyqaralyq forýmy kezinde tilshiler suraǵyna jaýap bere otyryp.

Osy oraıda ol Qazaqstan ıadrolyq qarýsyz álemdi qurýǵa erekshe mán berip otyrǵanyn, bul protseste elimizde belsendi túrde úlesin qosyp kele jatqanyn eske saldy.

— Sondyqtan Qazaqstan Prezıdenti qazir álemde geosaıası shıelenis kúsheıip kele jatqan kezeńde barsha adamzat úshin osyndaı úlken qaýip bar ekenin qadap aıtty. Osy oraıda jappaı qyryp-joıatyn ıadrolyq qarýdy taratpaý ustanymy óte mańyzdy, — dedi Syrtqy ister mınıstriniń orynbasary.

Budan buryn habarlanǵandaı, Prezıdent Qasym-Jomart Toqaev Astana halyqaralyq forýmynda elimizdiń ıadrolyq synaqtardan shekken zardabyna toqtaldy.