Qaqpashyny mazaq qylyp penaltı soqqan fýtbolshy belgisiz jaǵdaılarda qaza tapty
ASTANA. 3 naýryz. QazAqparat - Fýtbol tarıhyndaǵy eń kelemejdi penaltıdiń avtory, BAÁ quramasynyń oıynshysy Zeıab Avana kólik apatynan qaza tapty, dep habarlaıdy Lenta.rý.
Apat Ábý-Dabı qalasynyń mańynda fýtbolshy kezekti jattyǵýynan úıine qaıtyp kele jatqanda bolǵan. Onyń kóligi júk kóligimen soǵysyp qalǵan.
Apatta fýtbolshynyń inisi de zardap shegip, aýyr jaraqattarmen aýrýhanaǵa jetkizilgen. Keıbir buqaralyq aqparat quraldarynyń aıtýynsha, fýtbolshynyń ólimi de, apat ta jumbaqqa toly, bálkim bul kek alý shyǵar degen alyp-qashpa áńgimeler júr. Degenmen, kópshilik bul oqıǵanyń kezdeısoqtyq ekenine senedi.
Esterińizge sala keteıik, Avananyń esimi Lıvan quramasymen bolǵan kezdesýde soqqan penaltıinen keıin álemge tanyldy. Bul on bir metrlik aıyp dobyn fýtbolshy ókshesimen teýip salǵan edi, sóıtip buryn sońdy bolyp kórmegen «tapqyrlyǵymen» qaqpashynyń «aýzyn ańqıtyp» ketken. Fýtbol jankúıerleri men mamandary bul áreketti arsyzdyq dep tanyp, Avanany keshirim suraýǵa deıin májbúrlegen bolatyn.
