Qaqpashy Sherhan Qalmyrzaǵa rektorlyq bilim granty berildi
ALMATY. KAZINFORM – Ǵylym jáne joǵary bilim mınıstri Saıasat Nurbek Qazaq sport jáne týrızm akademııasynyń stýdenti Sherhan Qalmyrzamen júzdesti.
Kezdesý barysynda mınıstr buqaralyq sportty damytýdyń mańyzdylyǵyna toqtalyp, sondaı-aq joǵary bilimniń bolashaq urpaqty qalyptastyrýda sheshýshi ról atqaratynyn erekshe atap ótti.
– Memleket basshysy buqaralyq sporttyń damýyna aıryqsha mán beredi. Prezıdent óz sózinde: «Balalardyń amandyǵy, olardyń densaýlyǵy jáne sapaly bilim alýy – elimizdiń keleshegine tikeleı qatysy bar másele», – degen edi. Osy baǵytta biz de jastardy jan-jaqty qoldap, olardyń áleýetin ashýǵa jáne elimizdiń halyqaralyq deńgeıdegi bedelin arttyrýǵa jaǵdaı jasap kelemiz. Sondaı-aq barlyq sportshylar halyqaralyq standarttarǵa saı sapaly bilim alýy qajet ekenin atap ótkim keledi. Bul olarǵa sporttaǵy joǵary jetistikterge ǵana emes, sonymen qatar sporttyq mansabyn aıaqtaǵannan keıin de túrli salalarda qalyptasýǵa múmkindik beredi. Jas qaqpashynyń kórsetken tarıhı nátıjesi – búkil qazaqstandyq jastar úshin jarqyn úlgi. Ony osy jetistigimen quttyqtaımyn jáne aldaǵy oıyndarda sáttilik tileımin, - dedi Saıasat Nurbek.
Sondaı-aq búginde talantty jastardyń jańa býynyn qalyptastyrýǵa berik negiz qalanǵany atap ótildi. Jastarǵa úlgi kórsetý maqsatynda aqyly bólimde bilim alyp júrgen Sherhan Qalmyrzaǵa rektordyń bilim berý granty tabystaldy. Sonymen qatar aldaǵy ýaqytta da daryndy jastarǵa aıryqsha kóńil bólinetini jetkizildi.
Qazaq sport jáne týrızm akademııasynyń sport jáne tárbıe jumysy jónindegi prorektory Muhtar Esqalıev oqý orny jasóspirimder men stýdentterdiń bastamalaryn árdaıym qoldaıtynyn aıtty. Óz kezeginde stýdent-sportshy kórsetilgen iltıpat úshin rızashylyǵyn bildirip, Qazaqstandaǵy fýtboldyń damýyna úles qosýǵa nıetti ekenin jetkizdi.
Eske sala keteıik, buǵan deıin «Qaırat» qaqpashylar sheberhanasyna aınalyp kele jatqanyn jazǵan edik.