Kakaý: Qazaqstannyń namysyn qorǵaý - biz úshin abyroı
ASTANA. QazAqparat - Fýtzaldan Qazaqstan quramasynyń bas bapkeri Rıkardo Kamara Sobral (Kakaý) Serbııaǵa qarsy ótken EÝRO-2018 týrnıriniń shırek fınaldyq kezdesýi jaıly oıymen bólisti, dep habarlaıdy QazAqparat Prosports.kz saıtyna silteme jasap.
«Birinshiden, qarsylasymyz - Serbııa quramasyn keremet ótken oıynmen quttyqtaımyn! Biz úshin óte qıyn oıyn boldy. Ekinshiden, Qazaqstandy jáne meniń shákirtterimdi bul jeńispen quttyqtaımyn! Búgin olar ózderin jaqsy jaǵynan kórsetti. Taınan, Igıta jáne Dýglastar alańda kóp ýaqyt ótkizdi, demalmady dese de bolady. Olardyń arasynan, kapıtanymyz Dinmuhambet Súleımenovti erekshe atap ótkim kelip otyr. Ol 36 jasynda kirshiksiz oıyn kórsetti. Quramanyń jas oıynshylary Eýropa chempıonatynda birinshi ret oınaǵanyna qaramastan, nátıje jaqsy», - dedi ol.
Bas bapkerdiń atap ótýinshe, serbııalyqtarmen oıynda Qazaqstan quramasynda brazılııalyqtar ǵana emes, jergilikti túlekter de dop tebe alatynyn dáleldedi.
«Tún uıqysyn tórt bólip, bizge jankúıer bolǵan qazaqstandyqtardy quttyqtaımyn! Ár oıynshy, komandanyń ár ókili sizderge alǵys bildiredi. Bul týrnırde Qazaqstannyń namysyn qorǵaý - biz úshin abyroı. Eki ret qatarynan qurlyqtyń úzdik tórt komandasy qataryna enip, tarıhty qaıta jazyp otyrmyz. Barlyǵyna úlken rahmet!», - dep túıdi Kakaý.
Eske salaıyq, Slovenııada fýtzaldan ótip jatqan Eýropa chempıonatynda Qazaqstan quramasy jartylaı fınalǵa joldama aldy.
Kakaý jattyqtyratyn qazaqstandyqtar shırek fınalda Serbııa quramasymen kúsh synasyp, 3:1 esebimen jeńiske jetti.
Ulttyq quramanyń kelesi qarsylasy Ýkraına ne Ispanııanyń biri bolmaq. Fınaldyq báseke 8 aqpan kúni ótedi.
Aıta keteıik, qazaqstandyq fýtzalshylar 2016 jyly Serbııada ótken Eýropa birinshiligine tuńǵysh ret qatysqanyna qaramastan, qola júldeger atanǵan bolatyn.
