Kakaý Qazaqstan quramasynan jáne «Qaırattan» ketetinin aıtty
ASTANA. QazAqparat - Fýtzaldan Qazaqstan quramasynyń bas bapkeri Kakaý komandadan ketetinin málimdedi, dep habarlaıdy Sports.kz.
Bas bapker bul sheshimi jaıly Slovenııa astanasy Lıýblıanada ótip jatqan 2018 jylǵy Eýropa chempıonatynyń shırek fınalynan keıingi baspasóz máslıhatynda aıtty. Onyń shákirtteri osy oıynda Serbııa quramasyn 3:1 esebimen jeńgen bolatyn.
Kakaýdyń aıtýynsha, ol álem birinshiliginen keıin bas bapker qyzmetinen ketedi. Budan tys, brazılııalyq maman bıyl jazda Almatynyń «Qaırat» fýtzal klýbynan da ketetini týraly málimdedi.
Eske sala keteıik, Kakaý basshylyǵyndaǵy Qazaqstan quramasy qatarynan eki ret Eýropa chempıonatynyń jartylaı fınalyna shyǵyp, tarıhı nátıjege qol jetkizdi. Ol budan tys, «Qaıratty» ÝEFA Kýbogynyń eki dúrkin jeńimpazyna aınaldyrdy.
