Qaqaǵan aıaz: Qutqarýshylar kúre joldarda qalaı jumys istep jatyr
Elimizde jeltoqsannyń basynan beri sarshunaq aıaz kúshine minip tur. Qutqarýshylar, kommýnaldyq qyzmet mamandary tynymsyz jumys istep jatyr. Osy oraıda Kazinform agenttigi sońǵy jaǵdaılarǵa sholý jasaǵan edi.
Keshe túnde Kólik mınıstrligi habarlaǵandaı vedomstvo janyndaǵy ahýal ortalyǵynda jedel shtab quryldy.
Jol salasy mamandary tazalaý jumystarymen aınalysyp jatyr, alaıda joldyń kórinbeýine baılanysty bul jumys qıynǵa soǵýda.
Jambyl oblysynan Shymkent qalasyna deıin kólik qozǵalysyna shekteý qoıyldy. Sonyń saldarynan kólikter jınalyp jatyr.
Jergilikti organdar tótenshe jaǵdaılar, jol polıtsııasy jáne jol qyzmetterimen birlesip, júrgizýshiler men jolaýshylarǵa ystyq tamaq uıymdastyrdy.
Túrkistan oblysynda qar qursaýynda qalǵan 1000-ǵa jýyq jolaýshy qutqaryldy.
Boran men qatty aıazdan Túrkistan oblysyndaǵy 9 oblystyq, 1 respýblıkalyq mańyzy bar avtomobıl joly jabyldy.
Qutqarýshylar jolda qalǵan 1000-ǵa jýyq adamdy evakýatsııalaǵan. Jolaýshylar jylý beketterine ornalastyrylyp, ystyq tamaqpen qamtamasyz etildi.
«Respýblıkalyq mańyzy bar avtojolda 3 jylytý pýnkti daıyndaldy. Qazirgi tańda departamentte shtab qurylyp jedel jeli jumys istep jatyr», — delingen Túrkistan oblysy TJD baspasóz qyzmeti taratqan aqparatta.
Tótenshe jaǵdaı mamandary aıazdy kúnderde qandaı qaýipsizdik erejesin saqtaýǵa shaqyrady.
Aıta ketsek, elimizdiń barlyq aımaǵynda aýa raıy jaǵdaıy kúrdelene tústi. Mamandardyń aıtýynsha, qatty aıazda ásirese jas balalar men qart adamdar úshin muqtajdyq bolmasa kóshede júrýdiń, alys jolǵa shyǵýdyń qajeti joq.
El óńirlerinde aıazǵa baılanysty 46 jol jabyldy.
«Kóktaıǵaq pen aýa temperatýrasynyń tómendeýine baılanysty jeti aımaqta dızelmen júretin jeńil kólikter men avtobýstardyń qozǵalysyna shekteý qoıyldy», — dep habarlaǵan edi «QazAvtojol» ulttyq kompanııasy.
Qazaqstannyń birneshe oblysynda daýyldy eskertý jarııalandy.
Jambyl oblysynda qar qursaýynda qalǵan baqtashylar aman-esen tabyldy.
12 jeltoqsan kúni saǵat 00:24 shamasynda polıtsııa bólimine Shý aýdany Kókqaınar aýylynan 15 shaqyrym jerde sharýa qojalyqtardyń birinen 2 malshysy adasyp, joǵalyp ketken.
Habarlama boıynsha tez arada polıtsııa qyzmetkerleri, aýdan ákimdigi, TJD qyzmetkerleri, jergilikti turǵyndar, arnaıy jol tehnıkasy jumyldyrylyp, jedel izdestirý jumystaryn júrgizdi.
Qalyń qar basqan joldar «Greıder» tehnıkasymen arshyldy.
Shyǵys Qazaqstanda aıazǵa baılanysty birneshe jolda kólik qozǵalysy shekteldi.
12 jeltoqsan saǵat 18.00-den bastap respýblıkalyq mańyzy bar tasjoldyń 3 ýchaskesinde qoǵamdyq kóliktiń jáne dızelmen júretin avtokólikterdiń qozǵalysyna tyıym salyndy.
Tótenshe jaǵdaı mamandary Aqmola oblysynda jolda qalǵan 28 shetel azamatyn evakýatsııalady.
Aýmaqtyq TJD baspassóz qyzmetiniń málimetinshe, evakýatsııalanǵan sheteldikter Kókshetaý qalasynyń jylytý ornyna jetkizilgen.
Tótenshe jaǵdaılar mınıstrligi turǵyndary men qonaqtaryna tótenshe jaǵdaıǵa tap bolǵan jaǵdaıda 112 nómirine habarlasýdy suraıdy.
Sonymen qatar Tótenshe jaǵdaılar mınıstrligi qatty aıaz tehnogendik órttiń kóbeıýine yqpal etýi múmkin ekenin habarlady.
Qatty aıaz tehnogendik órtterdiń kóbeıýine yqpal etýi múmkin. Osyǵan baılanysty qutqarýshylar joǵary qýatty elektr qurylǵylaryn bir ýaqytta qosý arqyly peshti qyzdyrmaýǵa nemese elektr jelilerin shamadan tys júktemeýge keńes beredi.
Avtokólik ıelerine ashyq ottyń kómegimen avtomobılderdi jylytý qaýpi týraly eske saldy.
13 jeltoqsanda Túrkistan oblysyndaǵy respýblıkalyq mańyzy bar jolda 300-den astam júk kóligi qar qursaýynda qaldy.
Óńirdegi respýblıkalyq mańyzy bar jolda qar qursaýynda qalǵan 61 jolaýshy qaýipsiz jerge jetkizildi.
«Boran áli basylǵan joq. Óńirdegi 9 oblystyq, 1 respýblıkalyq mańyzy bar avtomobıl joly jabyq. Polıtsııa jáne tótenshe jaǵdaı departamentiniń jáne jol qyzmetteriniń kúsh-quraldarymen birge jumys istep jatyrmyz. Jolda qalǵan jolaýshylar qaýipsiz jerge jetkizilýde. Oblys turǵyndaryna uzaq jolǵa shyqpaý kerektigin eskertemiz», — dedi Túrkistan oblysy TJD tótenshe jaǵdaılardy joıý basqarmasynyń bastyǵy Talǵat Dosalıev.
