Kaıs Saıd Týnıs prezıdenti bolyp qaıta saılandy

ASTANA. KAZINFORM – Jeksenbi kúni Týnıste prezıdent saılaýy ótip, onda ekzıt-poll nátıjeleri boıynsha eldiń qazirgi prezıdenti Kaıs Saıd 89,2 paıyz daýys jınap, jeńiske jetti. Bul týraly Kazinform-nyń Iordanııadaǵy menshikti tilshisi Arsen Ýteshev habarlaıdy. 

«Boljaldy qorytyndy Kaıs Saıdtyń 89,2%, jalpy 2 194 150 daýys jınap, prezıdenttik saılaýda jeńgenin kórsetip otyr», - dep málimdedi Sigma Conseil zertteý kompanııasynyń dırektory Hasan Zargýnı Týnıs qoǵamdyq telearnasynda.

Týnıstiń táýelsiz saılaý organy jergilikti ýaqyt boıynsha keshki saǵat 18:00-de saılaý ýchaskeleri jabylǵan kezde saılaýshylardyń ýaqytsha qatysýy 27,7 paıyzdy quraǵanyn habarlady.

Daýys berýge barlyǵy 2,7 mln saılaýshy qatysty.

Saılaý organy 2 qyrkúıekte kandıdattardyń túpkilikti tizimin jarııalady. Onyń quramyna tórt úmitker kirdi: qazirgi prezıdent Kaıs Saıd, oppozıtsııalyq kandıdat, «Azımýn» qozǵalysynyń bas hatshysy Aıachı Zammel jáne Saıdtyń jaqtaýshysy – Halyq qozǵalysynyń bas hatshysy Zýhaır Magzaýı.

Dál sol exit-poll qorytyndysy boıynsha, Zammel 6,9% (169 myń adam), Magzaýı 3,9% (95 myń adam) daýys jınaǵan.

«Saılaý protsesi birqalypty ótti jáne biz osy saılaý kúnin buzatyn oqıǵalardy tirkemedik. Týnıstikter el ishinde de, shetelde de saılaý ýchaskelerine laıyqty keldi», - dedi Týnıs saılaý komıssııasynyń basshysy Farýk Býaskar baspasóz máslıhatynda.

Býaskardyń habarlaýynsha, saılaýshylardyń kelýiniń resmı jáne sońǵy kórsetkishteri saılaýdyń aldyn ala qorytyndylarymen birge dúısenbi kúni keshke jarııalanady.

Týnıs prezıdenti bes jyldyq merzimge saılanady. Týnıste burynǵy prezıdenttik saılaý 2019 jyly ótti, sol kezde táýelsiz kandıdat jáne konstıtýtsııalyq quqyq professory Kaıs Saıd ekinshi týrda jeńiske jetti. Ol 72% daýys jınady.