Kaırdiń ońtústiginen taǵy bir kóne pıramıda tabyldy
ASTANA. QazAqparat - Kaırdiń ońtústiginen bizdiń dáýirimizge deıingi XVII ǵasyrǵa jatatyn kóne pıramıda tabyldy. Bul týraly eldiń kóne muralar mınıstrligi málim etken.
Kóne muralar departamentiniń basshysy Mahmýd Afıfıdiń sózinshe, mysyrlyq arheologııalyq mıssııa el astanasynan ońtústikke qaraı 40 km qashyqtyqta júrgizip jatqan qazba jumystary kezinde boljam boıynsha perǵaýyndardyń XIII áýletiniń bıligi kezinde salynǵan pıramıdaǵa tap bolǵan, dep jazady TASS.
Mamandar tabylǵan ǵımarattyń jaqsy saqtalǵanyn aıtyp otyr. Qazirgi sátte onyń kireberisi qumnan arshyldy. Pıramıdanyń qalǵan bóligin arshý jumystary jalǵasyp jatyr.
