Kaırde qumdy daýyl tórt adamnyń ómirin qıdy
KAIR. QazAqparat – Qatty qumdaýyl beısenbi kúni Kaır aspanyn qyzǵylt túske boıap, avtokóliktegi óte úlken jarnama taqtasyn qulatty. Saldarynan bir adam qaza taýyp, beseýi jaraqat aldy. Bul týraly QazAqparat MENA-ǵa silteme jasap habalaıdy.
Kún raıynyń qolaısyzdyǵynan el astanasynyń joldarynda keptelis boldy. Bılik ókilderi Qyzyl teńizdegi eki portty jabýǵa májbúr boldy, sebebi jeldiń jyldamdyǵy shamamen 13 m/s, al tolqyndardyń bıiktigi 4 metrge jetti.
Polıtsııa Kaırdegi seriktes qalada jarnama taqtasy qulap taǵy bir adam qaza tapqanyn habarlady.
Kaırden shyǵysqa qaraı ornalasqan Sýets qalasynda tepe-teńdikti saqtaı almaǵan jas jigit tórtinshi qabattyń balkonynan qulap ketken.
Nil saǵasyndaǵy Menýfııa provıntsııasynda taǵy bir er adam qumdaýyl qurbany boldy. Oǵan qurma palmasy qulaǵan.
Qulap túsken alyp jarnama taqtasy Nildiń shyǵys pen batys jaǵalaýyn qosatyn October 6 kópirine ornatylǵan bolatyn. Kópirdegi kólik qozǵalysy toqtatyldy.
Internette jarııalanǵan kadrlarda alyp qum tolqyny Kaırden Sýetske qaraı qum dala arqyly qozǵalyp bara jatqany beınelengen. Ony kórip, úreılengen kólik júrgizýshileri keri burylyp, qarsy bettegi qozǵalys jolyna shyǵyp ketken.
«Hamasın» degen atpen tanylǵan qumdy daýyl Egıpette ádettegi qubylys sanalady, biraq mundaı iri jaısyz aýa raıy sırek kezdesedi.
Qumdy daýyl men aptap ystyq jumaǵa deıin jalǵasady degen boljam bar.
