Kaır halqy qazaq mádenıeti men ónerine qanyqty

ASTANA. QazAqparat - Mysyr astanasynda qazaq áýenderi shyrqalyp, jergilikti kórermenderdi baýrap aldy. Kaır opera teatrynda Qazaqstannyń Mysyrdaǵy mádenı kúnderine arnalǵan gala-kontsert ótti, dep habarlaıdy QazAqparat.

Kaırdiń basty sahnasynda otandyq artıster, sonyń ishinde Qazaqstannyń eńbek sińirgen qaıratkerleri, respýblıkalyq jáne halyqaralyq baıqaýlardyń laýreattary óner kórsetti. Olar Almasbek Almatov, Batyrjan Myqtybaev, «Saltanat» memlekettik bı ansambli, «Astana Opera» solısteri, «Alashuly», «Sulý» toptary jáne basqa da ónerpazdar boldy. Artıster estradalyq, halyq ánderi men klassıkalyq shyǵarmalardy oryndady. Olarǵa dırıjer Abylaı Tilepbergenniń basshylyǵymen Qurmanǵazy atyndaǵy ulttyq halyq aspaptar orkestri súıemeldedi.

Kontsert eki eldiń Memlekettik Gımnderin oryndaýdan jáne Senat spıkeri Máýlen Áshimbaevtyń quttyqtaý sózinen bastaldy. Zalda jergilikti kórermen kóp boldy. Gala-kontsert kórermenderi Mysyrdyń dástúrli áýenderiniń popýrrıin erekshe jyly qabyl alyp, zor qoshemet bildirdi.

Gala-kontsertpen qatar Kaır opera teatrynda qazaq qoldanbaly óneriniń kórmesi ótti. Ulttyq kıimdegi artıster men qolónershiler qonaqtardyń nazaryna qoldan jasalǵan dástúrli buıymdardy usyndy.

Gala-kontsertten keıin QR Mádenıet jáne sport mınıstri Ashat Oralov Mysyrdyń mádenıet mınıstri Nevın Ál-Kılanımen kezdesý ótkizdi. Ashat Oralov áriptesine mádenıet kúnderin uıymdastyrýǵa kómekteskeni úshin alǵys aıtyp, Ál-Kılanı myrzany jáne jergilikti artısterdi Qazaqstanǵa shaqyrdy.

«Mysyrda Qazaqstannyń mádenıet kúnderine arnalǵan is-sharalar joǵary deńgeıde ótkenin atap ótkim keledi. Kaır turǵyndary men qonaqtary bizdiń artısterimizdiń ónerine tánti bolǵanyna senimdimin. Álemdi qazaq mádenıeti men ónerimen tanystyratyn osyndaı is-sharalar basqa elderde de ótedi. Osylaısha, mádenıet salasynyń qyzmetkerleri álemdik sahnalarda óz talanttaryn kórsete alady. Mınıstrlik bul baǵytta belsendi jumys júrgizip jatyr», - dedi Mádenıet jáne sport mınıstri Ashat Oralov.