«Qaharyna» mingen «Qaıratty» áıgili «Barselona» da toqtata almaıdy» - baspasózge sholý
***
«Egemen Qazaqstan» gazetiniń búgingi sanynda «Jalaqy qaryzy óteldi» degen materıal berilgen. Prokýratýra qyzmetkerleri Atyraý qalasyndaǵy kásiporyndarda eńbek zańnamasynyń saqtalýyna, sonyń ishinde, jumysshylarǵa ýaqtyly eńbekaqylaryn tóleý boıynsha monıtorıng júrgizdi. Monıtorıngtiń nátıjesinde munaı jáne gaz salasynda qyzmet jasaıtyn «Gıýral» seriktestiginde 79 jumysshyǵa jalpy somasy 24 mln.teńgeden astam eńbekaqy tólenbegendigi anyqtaldy. Taldaý nátıjesi kórsetkendeı, jalaqynyń osyndaı iri kólemdegi jıyntyq somasy jumysshylarǵa ótken jyldyń qarasha, jeltoqsan jáne bıylǵy qańtar, aqpan aılarynda tólenýi tıis bolǵan. Bul fakti Atyraý qalalyq prokýrorynyń nazaryna alynyp, onyń uıǵarymymen atalǵan eńbekaqy somasy jumysshylarǵa tolyǵymen tólendi. Sonymen qatar, Atyraý qalasy prokýratýrasynyń usynysy negizinde «AtyraýBasJospar» JShS-men 63 jumysshyǵa jalpy somasy 3,3 mln. teńge bolatyn jalaqy qaryzy da túgeldeı óteldi.
Bas basylymda «Saılaý qorytyndylary anyqtaldy» atty maqala kópshilik nazaryna usynylyp otyr. Keshe Qazaqstan Respýblıkasy Ortalyq saılaý komıssııasynyń otyrysy boldy, onda 2015 jylǵy 26 sáýirdegi Qazaqstan Respýblıkasy Prezıdentiniń kezekten tys saılaýynyń qorytyndylary jarııalandy. Oblystyq, Astana jáne Almaty qalalyq aýmaqtyq saılaý komıssııalary usynǵan derekterge sáıkes, Ortalyq saılaý komıssııasy tizimderge engizilgen 9 547 864 saılaýshynyń 9 090 920-sy nemese 95,21%-y daýys berýge qatysqany belgili bolyp otyr. Saılaýshylar daýysy jalpy respýblıka boıynsha tómendegideı bólinipti: Ábilǵazy Qalıaqparuly Qusaıynovqa saılaýshylardyń 57 718 daýysy berilse, bul 0,64%-dy quraıdy. Nursultan Ábishuly Nazarbaevqa - 8 833 250 nemese 97,75%. Turǵyn Ysqaquly Syzdyqovqa - 145 756 nemese 1,61%.
***
«Aıqyn» gazetiniń jazýynsha, ýran óndirisiniń tabıǵatqa, adam densaýlyǵyna ákeler zardabyn qalaısha boldyrmaýǵa bolady?
Keshe «Qazatomónerkásip» UAK» AQ-nyń Almatyda ótken semınar-keńesinde ótken jyly holdıng kásiporyndarynda eńbekti, qorshaǵan ortany qorǵaý, radıatsııalyq, ıadrolyq jáne órt qaýipsizdigin qamtamasyz etý salasyndaǵy jumystarǵa qorytyndy jasalyp, ústimizdegi jylǵa jańa mindetter belgilendi. Semınar-keńeste birinshi bolyp sóz alǵan «Qazatomónerkásip» UTK» basqarma tóraǵasynyń birinshi orynbasary Sergeı ıAşın ótken jylǵy qaýipsizdik sharalaryn saqtaýǵa qatysty atqarylǵan is-sharalarǵa toqtaldy. Onyń aıtýynsha, qaýipsizdik talaptaryn buzý faktileri 2013 jylmen salystyrǵanda, 28 paıyzǵa azaıǵan. Al 2014 jyly kompanııa óndiristiń qorshaǵan ortaǵa teris yqpalyn barynsha azaıtýǵa, sý tazalaǵysh qondyrǵylardyń tıimdiligin arttyrýǵa baǵyttalǵan is-sharalarǵa 1,19 mıllıardtan astam teńge bólipti. Bul maqala «Radıatsııalyq qaýipsizdik - basty nazarda» degen taqyryppen jarııalandy.
Osy basylymda «Qaharyna» mingen «Qaıratty» áıgili «Barselona» da toqtata almaıdy» atty maqala basyldy.
«Búgingi tańda «Qaırat» álemdegi eń beldi komandalardyń birine aınalýy joǵarydaǵy sózimizge aıqyn dálel bola alady. Iá, bázbireýler «bul ujymnyń teń jarysynan astamy - brazılııalyq fýtbolshylar. Onda nesine qýanamyz?» dep aıtýy da múmkin. Biraq bul álemdik sportta bar úrdis. Búgingi tańda barlyq beldi komandanyń sapynda legıonerler qaptap júr. Bul zamanaýı úrdisten qashyp qutylý da múmkin emes. «Qaırattyń» sapynda Dinmuhamed Súleımenov, Serik Jamanqulov, Tımýr Murzabaev jáne Ǵalymjan Qosmuhambetov syndy qandastarymyzdyń óner kórsetip júrgenin esten shyǵarmaǵan jón. Olaı bolsa, almatylyqtardyń bul tabysy barsha qazaqstandyqtarǵa ortaq dep aıtýǵa barlyq negiz bar», - dep jazady maqala avtory.
***
«Ekspress-K» basylymynyń búgingi sanynda «Ýspehı Kazahstana vıdny daje ız kosmosa» degen materıal berilgen. Halyqaralyq ǵarysh stansasynyń reseılik ekıpajy Nursultan Nazarbaevty prezıdenttik saılaýdaǵy jeńisimen quttyqtady. Gennadıı Padalka, Mıhaıl Kornıenko jáne Anton Shkaplerov ǵaryshtaǵy salmaqsyzdyq kúıde bizdiń elimizdegi saılaý naýqanyn qyzyǵýshylyqpen baıqap otyrǵan eken.
«Saılaý naýqany kezinde biz qonaqjaı qazaq jerinen sátti ushqan bolatynbyz. Sizdiń qýanyshyńyzben bóliskimiz keledi. Sizdiń elińizdiń beıbitshilik saıasatty ustanǵan tájirıbesi kóptegen memleketter úshin úlgi boldy. Qazaqstan ǵaryshtan jaqsy kórinip otyr, bul - qýatty, kúshti ári ádemi memleket», - delingen ǵaryshkerler quttyqtaýynda.
