Qahar Dadashev: Táýel­siz eldiń bas­ty tabysy – yntymaq pen bereke

QYZYLORDA. QazAqparat – Bizdiń tilegimiz bir, maqsatymyz aıqyn. QR Prezıdenti Qasym-Jomart Toqaevtyń «Táýelsizdik bárinen qymbat» atty maqalasyna qatysty Qyzylorda oblystyq ózbek etnomádenı birlestiginiń jetekshisi Qahar Dadashev osyndaı pikir bildirdi, dep habarlaıdy QazAqparat.

Jas kezimde el ishindegi aq­saqal­darǵa sálem bere júrip talaı áńgime tyń­daǵanym bar. Sondaıda qarttar tálim­di sózin «Adam basyna baqtyń qon­ǵa­nyn bilmeıdi, ushqanyn biledi» dep tú­ıin­deı­tin. Yntymaq pen bere­keni erte jú­retin sol baq qazir Qazaq elinde. Táýel­siz eldiń bas­ty tabysy da osy.

Al sol basty tabysqa biz birlik pen tatýlyǵymyzdy berik saqtap, Tuńǵysh Prezıdentimizdiń arqasynda jettik dep bilemiz. Aýyzbirshilik pen túsinistik, qarapaıym syılastyq ústemdik qurǵan jerde qashanda nátıjeli isterdiń bolatyny belgili. Bizdiń elimizde qalyptasqan ulttar tutastyǵy men halyqtar dostyǵy arqasynda búginde memleketimiz órkendep, ilgeri basyp keledi.

Damýdyń syry - birlikte, tabystyń syry - tirlikte degendeı, ortaq Otanymyz Qazaqstannyń bosaǵasyn berik, shańyraǵyn bıik ustap, tútinin túzý ushyrý eldik mindet. Bizdiń tilegimiz bir, maqsatymyz aıqyn. Ol jeri gúldengen, eli túrlengen, damýy jedel, urpaǵy kemel máńgilik Qazaqstan. Jaqynda jarııalanǵan Memleket basshysy Qasym-Jomart Toqaevtyń maqalasy da soǵan dálel.

Qazaqstanda turatyn etnıkalyq toptar – bul dostyqtyń ózindik kópiri ispettes. Dostyq pen tyǵyz baılanystardyń nyǵaıýyna kórshi memleketterde turatyn etnıkalyq qazaqtar da yqpal etedi. QHA etnomádenı birlestikteri mádenı-gýmanıtarlyq baılanystardy tereńdetýge, elimizge ozyq tehnologııalardy ımporttaýǵa jáne t.b. septigin tıgizip keledi.

Bir shańyraq astyna túrli ult pen ulysty uıystyryp, búginde ultaralyq tatýlyqtyń úlgisine aınalǵan elmiz. Tarıhtan belgili, taǵdyr tálkegimen jan saýǵalaǵan talaıdy baýyryna basqan, ózgeniń qaıǵysyn óz qaıǵysyndaı bólisken uly dala urpaǵynyń ulylyǵy bul. Talaı zamandy bastan ótkerip, táýelsizdik elge aınalǵan Qazaq eli jerin mekendegen ult pen ulystyń Otanyna, birlik mekenine, qoǵamdyq kelisim ortalyǵyna aınaldy. Búgingideı aqparattar tasqyny zamanynda aınaladaǵy oryn alyp jatqan jaǵdaılardan jurtshylyq árdaıym habardar. Tynyshy ketken, beıbit kúndi arman etken elderdi mysal etýdiń ózi artyq bolar. Búgingi táýelsiz qazaq eliniń baıraǵynyń kókpen talasa jelbireýi de birlik pen yntymaqtyń arqasy. Sondyqtan birligimizdi berik saqtaıyq, aǵaıyn!