Qaǵylǵan shegeni tisimen sýyratyn azamat elordada turady
ASTANA. 5 aqpan. QazAqparat - Qaǵylǵan shegeni tisimen sýyryp alatyn adamnyń baryna senesiz be? Iá, ondaı adam bar. Tisi temirdeı myqty adam Astanada turady,
dep habarlaıdy 24.kz.
Qazir ol Respýblıkalyq ulanda áskerı qyzmette. Bir qyzyǵy úlken shegelerdi qas-qaǵym sátte qolymen túıinshektep tastaıdy. Jerlesimiz qazir Reseıdiń «Mınýta slavy» teleshoýyna qatysyp, shırek fınalǵa ótti.
Úlken shegelerdi alaqanymen qaǵý, ony tisimen julyp alý, synǵan shynylardy jalań aıaq basyp, syndyrý - Sergeı Tsyrýlnıkov úshin túk emes. Bul ónerdi ol bir-eki jyl buryn ǵana úırene bastaǵan. Qoldyń kúshi jetpeıtin zatty tisimen ońaı kóteredi.
- Bul ónerdi úırengenime kóp bola qoıǵan joq. Buryn qyzyǵatynmyn. Ónerdi qolǵa alǵan soń, ózimdi kádimgideı rýhanı túrde tárbıeledim. Óner kórsetkende kóbi senbeı, kelip qolymdy, tisimdi tekserip jatady. Týystarym, dostarym meni qoldaıdy, - deıdi ol.
Jerlesimiz bul óneri arqyly kúlli Reseı jurtyn da tań qaldyrdy. Qazir sonda ótetin teleshoýdyń shırek fınalyna qatyspaqqa daıyndalyp jatyr. Buıyrtsa erekshe óner kórsetip, rekord jańartýǵa tyrysamyn deıdi.
Sergeı búginde Respýblıkalyq ulan qatarynda sport sheberlerin daıyndaıdy. Gvardııaǵa 2006 jyly áskerı boryshyn óteýge kelgen jas sarbaz kelisimshartpen qyzmetin jalǵastyrǵan.
