Qaǵbadaǵy qajylyqty beınelegen saǵat shyǵaryldy
ASTANA. QazAqparat - Shveıtsarııalyq Christophe Claret saǵat brendi jańa eksklıýzıvti serııanyń tusaýyn kesti. «Mecca» serııasy boıynsha Mekkedegi Qaǵba beınesi bar 56 saǵat satylymǵa shyqty. Aıta keteıik, bul saǵat musylman qaýymyna arnalyp otyr.
Eger shveıtsarııalyq kompanııa usynǵan «Mecca» saǵatyna musylman qaýymynan suranys artyp jatsa, saǵat shyǵarý mólsheri de kóbeımek, dep habarlanǵan Nur Astana meshitiniń saıtynda. «Mecca» saǵatynyń dızaıny da erekshe: tsıferblattyń ortasynda eki ulǵaıtqysh parabolaly aına ornatylǵan, ol Qaǵba ispettes qara tústi kýbty ustap turady. Al saǵat ıesine Qaǵba tasy tsıferblattan kóterilip jatqandaı kórinedi. Saǵattyń allegorııalyq formasy Mekkedegi taýaf rásimin de qamtyǵan. Saǵatty taqqan adam qozǵalysqa túsken kezde tsıferblat betinde jybyrlaǵan qum sekildi aq tústi qıyrshyqtar «Qaǵbany» aınalǵan qajylardaı kórinis beredi. Dızaınerler osylaısha Qaǵbadaǵy qajylyqty kórsetýge kúsh salǵan. «Mecca» saǵatynyń taǵy bir artyqshylyǵy bar: teri baýǵa bekitilgen shaǵyn kompasty arnaıy navıgator arqyly qosyp, qaı jerde júrseńiz de qubylany qıyndyqsyz tabasyz. Sondaı-aq saǵattyń artqy bóliginde álem kartasy beınelengen.
