Qaǵazsyz bolashaq: Qaraǵandy oblysy elektrondyq qujat aınalymyna kóshedi
El prezıdenti Qasym-Jomart Toqaev memlekettik basqarý júıesinde barlyq qujat aınalymyn elektrondyq formatqa kóshirýdi talap etti.
Óńir Memleket basshysynyń tapsyrmasyn oryndaýǵa kirisýde.
Oblys ákimi Jeńis Qasymbek Documentolog kompanııasynyń basshylyǵymen kezdesti. Ol qujat aınalymyn avtomattandyrý salasynda otandyq kóshbasshy bolyp tanyldy.
Baǵdarlamalyq jasaqtamany ázirleýshiler bultty tehnologııalarda qurylǵan óz sheshimderin usyndy. Kompanııa eki jobany usyndy: ákimdikterdiń ishki qyzmetin avtomattandyrý jáne vedomstvolyq baǵynyshty uıymdarmen ózara is-qımyl boıynsha.
- Eki jobanyń da kózdegeni bir maqsat – qaǵazdan bas tartý. Qazirgi ýaqytta Qazaqstanda elektrondyq tsıfrlyq qoltańbasy bar qujattardy qaǵazǵa teńestirýge múmkindik beretin barlyq qajetti zańnamalyq baza bar, - dep atap ótti Documentolog bas dırektory Baıjan Qanafın.
Internet arqyly árkim memlekettik organdarǵa habarlasyp, jaýap ala alady. Hattardy qaǵaz tasyǵyshqa basyp shyǵarýdyń qajeti joq.
Elektrondy qarym-qatynas bıýrokratııadan qutylýmen qatar materıaldyq paıda ákeledi. Mıllıondaǵan teńgeni qaǵaz satyp alý, kýrerlik qyzmetter, prınterler men skanerlerge qyzmet kórsetýdi qysqartý arqyly únemdeýge bolady.
Kezdesý qorytyndysy boıynsha ózara yntymaqtastyq týraly Memorandýmǵa qol qoıyldy.
- Memleket basshysynyń «Tsıfrlyq Qazaqstan» baǵdarlamasyn júzege asyrý jónindegi keńeste bergen tapsyrmasyna sáıkes, Qaraǵandy oblysynyń ákimdigi tolyǵymen elektrondy qujat aınalymyna kóshedi. Muny qysqa merzimde josparlap otyrmyz. Pılottyq jobalardy Saran ákimdigi men aqparattandyrý, memlekettik qyzmetterdi kórsetý jáne muraǵattar basqarmasynda iske qosamyz. Budan keıin basqa da memlekettik organdarǵa engizemiz, - dedi oblys ákiminiń orynbasary Álisher Ábdiqadyrov.